Aizawlah Red Fest hmang
Mizoram State AIDS Control Society (MSACS) leh National AIDS Control Organization (NACO) tangdun buatsaih North-East Multimedia Campaign (Red Fest) chu Zirtawpni khan Aizawlah hman a ni.
Hmanpuitu Health & Family Welfare minister Lalrinpuii chuan, Red Fest-in a tum HIV laka kan him leh him loh hriatchianna atan in-test a pawimawh tih a sawi a. Vanduia thilthu-ah kan rin loh deuh deuh zingah HIV hrik pai an awm thin avangin mahni dinhmun hriatchian a pawimawh a, amah ngei pawhin HIV test a ti tih a sawi.
Chief secretary Khilli Ram Meena pawhin inenhran leh indiriam hlauh avanga HIV in-test ngam lo an awm thin tih sawiin, mipuiin HIV hrik paite endawng lo tur leh mi pangngai tho an ni tih hrereng turin a chah.
Multi-Media Campaign (Red Fest) hi kum 2018 atanga buatsaih tan niin, kumtin state hrang hrangah neih a ni. Kumin hi Mizoram-in a thlen kum a ni a. State tin atangin project director leh State AIDS Control Society hotute bakah NACO atangin hotuten an rawn hmanpui a ni.
North East Red Fest tum ber chu, thalaite hnenah HIV/AIDS chungchang zirtir a ni a. NE state 8 atangin rimawi hmanga HIV/AIDS awareness neih a ni. State hrang hrang atangin stall buatsaih a ni a, heng stall-ah hian state tin atanga State AIDS Control Society-ten HIV chungchang zirtirna hmanraw hrang hrang an pholang.
Aizawlah Red Fest hmang
