Aizawlah ruihhlo man a to

Ruihhlo a hluar a, a tam avangin a man pawh tlawm tur ni awm tak, tunlaiin a to tlat thung a, a man hi a pung viau a nih hmel.
Thu dawn danin, Aizawl khawlaiah tunlaiin heroin man a pung a, chhin sen 1 man Rs 700-800 te a ni. Hman ni lawk kha chuan chhin sen khat hi Rs 600 te a ni a, Rs 500 te pawh a ni.
‘Chhin sen’ tih hi heroin zuarte leh a leitute sawi dan a ni a, chhin sen 1 tih hi an zawrhna hniam ber a ni. ‘Chhin sen’ chungah hian tic tac a awm leh a, tic tac 1 hi tunlaiin RS 2500 te a ni awm e. |henkhat chuan Rs 2000 te pawhin lei tur a awm an ti.
Heroin man hi a pung a, mahse lei tur chu a awm reng tho an ti. Chutih rual chuan, tun hnaiah police an duty ngawrh a, India ram prime minister-in Inrinni-ah Aizawl a tlawh dawn vangin khawlaiah police an duty ngawrh a, heroin zuarte leh a lei duhte a hma angin an zalen lo. Hei vang hian heroin hi a lei duh tan pawh zawn ve deuh a ngai an ti.
Heroin ti thinte’n chhin sen 1 hi vawi khat tih atan an hmang a, vawi hnih tih atana hmang pawh an awm. Chuta tang chuan sum lama a hautak turzia a hriat theih mai awm e.
Hun engemaw chen chu Aizawl khawlaiah ruihhlo a zalen tawh a, khawlaiah duh tawka lei tur a awm a ni ber. Aizawl hmun lun lai hmun hrang hrangah ruihhlo sulhnu hmuh tur a awm thin a, hmun lun ber ber laiah hian chhun pachangah pawh an inchiu mawlh mawlh thin.
India ram prime minister-in Inrinni-ah Aizawl a tlawh dawn avangin tun hnaiah police an duty ngawrh a, hei vang hian a zuarte leh a lei duhte pawh an tawmim deuh. Khawlaiah ruihhlo leh a sulhnu hmuh tur a hma angin a tam rih lo a, Rangvamual lam erawh a ngai reng an ti.