Aizawl khawpuia hmun ruat bikah hun bituk awmin traffic police thunun ni lo, traffic signal light hmanga lirthei leh a bulhnaia kea kalte thunun leh kaihhruaina tur ‘Adaptive Traffic Control System’ chu November 13 atang hian hman chhina inzirtir a ni dawn.
Aizawl Smart City Ltd. hmalaknaa Adaptive Traffic Control System (ATCS) kalpui chhin tum a nih thu hi senior ST Traffic Aizawl chuan mipui a hriattir a. Traffic signal light (a sen, a eng leh a hring) hmanga lirthei tlan dan enkawlna tur hian Bazar Bungkawn leh Bawngkawn Sairang penga a dahte chu karleh Thawhtanni atangin inzirtira enchhin tum niin, chawhma dar 11.00 atanga chawhnu dar 3.00 thleng neih thin tur a ni.
Enchhinna hi tluang taka kalpui a nih theih nan leh traffic signal light hi Aizawl khawpuiah engti ang chiaha hman tur nge hriat a nih theih nan lirthei khalhtuten traffic signal light awmzia hre thar a, traffic police duty-te thu ngaichang turin mipui a hriattir a. Enchhin laia signal light zawm lote chu Motor Vehicle Act hnuaia hrem theih an ni tih a sawi.
Traffic signal light hman dan video clip leh thlalak chu Aizawl Traffic Police official Facebook group “Aizawl Traffic Police” ah en theih a ni a, lirthei khalhtuten zawm theuh tur leh an tlan theih huna tlan mai thei turin countdown timer uluk taka en turin Traffic SP hian mipui a hriattir a, khualkhua atanga Aizawla zinte pawhin zawm vek tura tih an ni tih a sawi bawk.
Aizawlah traffic signal light ring chhin dawn
