Aizawlah Youth-20 Meet nei
Youth Services department leh Mizo Zirlai Pawl tangdun chuan ‘Youth-20 Meet on Nationalism, Patriotism & Development’ tih chu Thawhtanni khan Aizawlah an buatsaih.
He hun hmanpuitu deputy chief minister Tawnluia chuan thalaiten hma an sawn a, kawng hrang hrangah an mamawh anga dawmkang a, an tan kawng zau zawk hawnsak chu Mizoram sawrkarin a ngaihpawimawh thu leh chumi atana hmalakna hrang hrang siam a nih thu a sawi a. Y-20 meet pawh hian thalaite tan hlawkna a thlen ngei a beisei tih a sawi.
Rorelna khat hnuaia Zofate awm duhna vangin hnam movement a lo chhuak a, thangtharte rilru ah he hnam thinlung hi kan ram innghahna a ni tih an hriat a, hmasawnna atan a pawimawh tih an hriat zui zel a duh tih a sawi bawk.
Youth Services minister Robert Romawia Royte chuan history enlet pawhin hnama chiang, hnam anga inphuarkhawm tlat te chu an dingnghet nge nge thin tih a sawi a. Mizo history-ah pawh hnam chhan tura nationalism movement kha lo awm ta lo se, hnam chimral, a aia lian zawkten an pumbilh chan a chan theih tih a sawi.
India ramin kumin chhunga G20 presidency a chelh mekah economy leh kawng hrang hranga hmasawnna hnaah G-20 ram hrang hrang thalaite chu ram leh khawvel nghahfak an nih avangin an pawimawhna an hriat theihna’n leh kawng hrang hranga ram hmasawnna atan hnukhnai turin Y-20 hi buatsaih a ni. July 14 khan chief minister Zoramthanga chuan Mizoram puma kalpui turin a khuhhawng a. Tun tum programme ah hian resource person atana sawm sawrkar official-ten thalaite tana tangkai tur thu an sawi a ni.
Aizawlah Youth-20 Meet nei
