Ni hnih awh tur Zoawi Kut 2023 chu Ningani khan Dawrpui Multipurpose Hall-ah neih tan a ni a. North Eastern Council (NEC) bultum niin Art & Culture department leh Mizo Zaimi Insuihkhawm Gen. Hqrs. tangdun buatsaih a ni. Kut thupui chu “Unity through Music” (Rimawi kaltlanga Inpumkhatna) tih a ni.
Kut hawngtu Art & Culture minister R Lalzirliana chuan impumkhatna thupui hmanga a vawikhatna’n Zoawi Kut buatsaih chuan rimawi leh lam hmanga India hmarchhak state-a chengte a hnuhhnaih ngei a beisei thu a sawi a. Culture chu ram leh a chhunga chengte min chawimawitu, khawvel hmuha min pholangtu leh hnam anga min phuarkhawmtu a ni, tiin, hmarchhak chu India state dangte lakah danglam bikna tam tak neiin, hnam tlem zawk kan nih tlangpui avangin kan hnam ziarang theuh hlu tak takte hi kan hloh mai lohna’n kan chawilara kan chhawmnun zel a pawimawh tih a sawi a ni.
Chief secretary Dr Renu Sharma pawhin a hawn hi hmanpuiin, Kut thupui chu tunlai kan hun tawn nena inhmeh tak a ni tih a sawi a. Inpumkhatna chu tun darkara kan mamawh langsar ber a ni, tiin, mimal leh hnam anga kan nuna rimawiin hun pawimawh tak a chan dan, mi phuarkhawtu a nih dan, hnam hrang tawng hrang hmangte pawh rimawi hmanga kan inpumkhat theih zia a sawi a ni. Zoawi Kut chuan he inpumkhatna thinlung hi India hmarchhak state unaute zingah a thara a thlen leh ngei a beisei tih a sawi bawk.
Art & Culture director Carol VLMS Dawngkimi chuan Kut chhimtute lawmna thu a sawi a. Mizote nuna lunglen ni ah te, lawm ni ah te hla leh zai hi bet tlat, hnam ziarang pawimawh tak a ni tih a sawi a. He kut hian hnam hrang hrang karah kan danglamna kalkanin rimawi leh lam hmanga inpumkhatna a thlen ngei a ring tih a sawi a ni.
Zoawi Kut ni khatnaah hian Mizoram bakah Tripura, Meghalaya, Assam, Nagaland leh Arunachal Pradesh atangin zaithiam hrang hrang leh cultural troupe te telin zai leh lam ngaihthlaka thlirho a ni.
Aizawlah Zoawi Kut hmang
