Mizo Zirlai Pawl buatsaihin Thawhlehni khan 1966 March 5-a bomb hmanga Mizoram beih champha, ‘Zoram Ni’ hman a ni.
Hmanpuitu Home minister K Sapdanga chuan, Mizo hnamin kan tawrhna chu theihnghilh chi a ni loa, MZP-in a tha zawnga kumtin a hmang chu a lawmawm, tiin a sawi. “Jet fighter hmanga Mizoram beih champha hi hnam hmangaih tharna a nih ngei ka beisei. Khawvel hmundangah pawh an ram leh hnamin harsatna an tawh ni hi a tha zawngin an hmang thin a. Japan-a America-in Hiroshima leh Nagasaki a bomb ni chu World Peace Day tia hman thin a ni,” a ti.
MZP president H Lalthianghlima chuan ram leh hnamin hun harsa a tawh chu theihnghilh mai chi a ni loa, phuba lak tumna leh thinrim tharthawhna tur niloin, hnam anga tanrualna leh inpumkhatna ni atan hman a tul tih a sawi. “Zofate kan inlungrual a, kan inpumkhat hi kan hnam dinchhuahna tura thil pawimawh a ni,” a ti.
Kumin Zoram Ni thupui “Zofate insuihkhawmna hmathlir” tih hman a ni a, asst professor Dr Vanlalremruata Tonson paper buatsaih zir ho a ni.
Aizawlah ‘Zoram Ni’ hmang
