Al-Ettifaq player thar Henderson
Saudi Pro-League chuan player lar a hip zui zel a, Al-Ettifaq chuan Liverpool leh England midfielder Jordan Henderson an la lut fel a, kum thum daih contract an ziahpui.
Saudi Pro-League 2022-23-ah pasarihna Al-Ettifaq hian July thla tir khan an manager thar atan Liverpool captain hlui Steven Gerrard an ruat a. Gerrard hian Liverpool-a a khelhpui thin, a hmunruak luaha Liverpool captain ni mek Jorder Henderson hi an team a hruai luh atan a hmu tai nghal. Player langsar lak tumin hma an la zui nghal a, ningani khan Liverpool captain Henderson hi an la lut fel ta nge nge a ni.
Al-Ettifaq hian kum 33 mi Henderson manah £12m an pe phawt a, a khelh that dan a zirin an pek belh leh ang. An player thar hi kar khatah £700,000 zet hlawh an pe dawn niin tarlan a ni a. Hetiang zat hlawh theihna hi uai thla lam tan chuan hnar phal rual a ni lo.
Jordan Henderson hian kum 2011 khan Liverpool hi Sunderland atangin a zawm. Kum 2015-ah captain Steven Gerrard a chhuah hnu khan team captain a ni zui nghal. Reds tan hian inelna hrangah hrangah vawi 492 zet a khel tawh a, goal 33 a thun tawh bakah assist vawi 57 a nei. Liverpool hi trophy pasarih a lakpui hman a. Trophy an lak zingah hian English Premier League leh champions league a tel nghe nghe. Kum 2010 atanga khan England senior team tan a khel tan a. Three Lions tan hian inelna hrang hrangah vawi 77 khelin, goal thum a thun tawh.
Al-Ettifaq player thar Henderson
