Ningani zing lam khan Fifa Club World Cup khelh chhunzawm a ni a, champion tura rinkai zinga mi Real Madrid an chak zo lo. Real Madrid an chak zawh loh lai hian Manchester City leh Juventus ten hnehna an chang ve thung.
Real Madrid 1-1 Al-Hilal
Khawvela football club hausa leh hlawhtling ber Real Madrid hian manager thar Xabi Alonso hnuaiah a vawi khat nan inelna an hmachhawn. Alonso hnuaiah beiseina sang tak nei bawk mah se beisei angin bul an tan tha lova, Saudi Arabia club lian Al-Hilal nen 1-1 in an inhnehtawk ringawt.
Hard Rock Stadium-a inkhelah chak tura rinkai zawk Real Madrid in goal an thun hmasa a, Gonzalo García chuan minute 34-naah hmahruaina goal a thun. Goal thun hmasa zawk an nih vangin phur viau mah se Real Madrid an phur rei lova, goal an chhuah thuai. Chawlhlawk dawn hnaiah Los Blancos hian penalty an chawi. He penalty hi Al-Hilal tan Rúben Neves chuan a pet goal a, minute 41-naah pet goal in an si phurh a sut. Neves goal thun hnu hian chawlhlawk hmain goal dang a luh belh thei tawh lova, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal thun tumin an innawr awn nasa hle. Inkhel hmuhnawm takah hian hun tawp thlengin goal dang a luh belh theih lova, 1-1 inhnehtawk chungin an inthathen. Champions League-a vawi 15 zet champion tawh Real Madrid in Al-Hilal an hneh zo lo hi result tha a ni hauh lova, manager thar Alonso tan bul tanna duhawm lo tak a ni.
Al-Hilal nen 1-1-a an inhnehtawk tum hian Real Madrid player thar Trent Alexander-Arnold chuan a club thar tan bul a tan a, a che tha viau nghe nghe. Real Madrid hian England leh Liverpool defender Trent Alexander-Arnold hi £8.4m sengin an la lut. June thlaah contract hmang zova, free transfer-a lak theih ni bawk mah se Real Madrid hian Club World Cup khel tura hruai an duh bawk si a. Liverpool tan vawi 354 zet kel tawh Arnold hi £8.4m zet sengin an lak luh a ngaih phah ta a ni.
Group H-ah Real Madrid in hnehna an chan zawh loh lai hian RB Salzburg chuan an khingpui Pachuca chu 2-1 in an lo hneh ve thung. RB Salzburg tan hian Oscar Gloukh leh Karim Onisiwo ten goal an thum. Pachuca laka an point thum hmuh hmangin Salzburg hian Group H-ah hma an hruai zui nghal a ni.
City 2-0 Wydad AC
Team ngaihven hlawh Real Madrid an chak zawk loh lai hian EPL club lian Manchester City chuan si hnih faiin Wydad AC an hneh a, point thum nen bul an tan ve thung.
Group G-a inkhelah Manchester City hian Wydad AC lakah bul an tan tha viau a, inkhel tan atanga minute hnihna lekah England forward Phil Foden chuan hmahruaina goal a thun nghal. Hma takah goal thun bawk mah se beisei angin goal an thun belh mai thei bik lo thung. Goal lut a awm belh loh vang vang hnu, goal hmahruai an thun atanga minute 40-na chiahah City tan hian Jérémy Doku chuan City goal hnihna a thun belh zui leh a, si hnih faia hmahruai chungin chawlhlawk an hmang.
Chawlhlawk hnu lamah inkhel a hmuhnawm leh zual a, beisei phak bakin Wydad AC in Manchester City an chai thei. Hun tawp dawn hnaih minute 88-naah Rico Lewis hnawhchhuah a nih vangin Wydad AC phur thar mah se hun tawp thlengin goal an thun belh thei lova, Fifa Club World Cup-a bul an tannaah an tlawm.
Group G-a inkhel dangah Italian club lian Juventus chuan 5-0 ngawtin an khingpui Al Ain an sawp ve thung a, awlsam takin point thum an hmu.
Juventus hian Al Ain an ngam viau a, minute 58 chhungin goal nga ngawt an thun hman. Inkhel tan atanga minute 11-na lekah Randal Kolo Muani chuan hmahruaina goal a thun a. France forward Kolo Muani hian minute 45+4-ah an goal hnihna a thun belh leh bawk. Juventus goal dang hi Francisco Conceição goal hnih leh Kenan Yildiz te goal khat thun a ni.
Group G-ah hian Juventus in hma an hruai a, Juventus point hmuh zat hmu chungin Manchester City in pahnihna an luah a. Wydad AC leh Al Ain ten point an la hmu ve rih lo. Khelh hmabak vawi hnih an la nei theuh thung.
Al Hilal lakah Real Madrird an chak zo lo
