Al-Hilal nena inthen fel Neymar
An ram club lar Santos-a kirleh tumin Brazilian Neymar chuan hliam avanga a inkhelhsak hleih theih lohna Al-Hilal nena an inremna a titawp fel ta.
Kum 2023 August thla khan Neymar hi Saudi Arabia club hausa Al-Hilal chuan euro maktaduai 90 (£77.6m) tehrengin senglut ve bawk mah se Arab ram a thlenthlak hnuah hliamin a bawhbuai zui ta tlat a, Saudi Pro League club tan hian pawl pahnih inremsiamna anga a contract tihtawp a nih thleng khan match sarih chiah a khel hman!
Tun season kal laiah hian game hnih chiah khelin, Al-Hilal tana a khelh hnuhnunber chu nikum November thlaa substitute bench thawhsana khelmual a luh kha a ni.
Brazilian club Santos chuan an kianga career tan Brazil international chu kum 32 mi lai ni tawh mah se an la iai lo a, tunlai hian sengluh leh ngei tumin indawrna an kalpui mek a ni.
An attacker chhawr hman mang loh nena inremna an siam behchhana thuchhuah an siamah Al Hilal chuan an club-a a khawsak chhunga a pekchhuahte avangin Neymar chungah lawmthu an sawi a, a career lehzel tur atan hlawhtlinna chang turin duhsakna an hlan nghal.
Major League Soccer club Chicago Fire pawhin Neymar hi United States-a hruailuh tumin an dawr a, mahse, player ber hian a club hlui Santos-a kirleh a thlan zawk avangin America mite dawrna hi a hnar fithla ta a ni.
Fire hian Neymar hi an ‘discovery list’ zinga an telh avangin anni chiah hi MLS team zinga US-a Neymar hruailut tura inbiakna kalpui thei awmchhun an ni nghe nghe.
Inter Miami pawhin an kianga kal tur leh a Barcelona team-mate pahnih Lionel Messi leh Luis Suarez-te nena suihzawm leh an duh a, an hlawhchham ve ta tho a ni.
Kum 2017 daih tawha Paris St-Germain lamin pound maktaduai 200 zeta Neymar an lakluhna man kha khawvela footballer leina atana sum phawrh hraw ber tun thlengin a la ni ta zel a ni.
Kum hnih chhung atana Al-Hilal a zawm avangin Neymar hian tuna inremna a tihtawp lai khan a contract-ah thla sarih hun a la nei a; Arab team-a a hlawh kha media-te tarlan dan chuan kum khatah euro maktaduai 150 (£129.2m) a ni hem mai!
Saudi club a zawm chhan kha amah chuan sum vang a nih loh thu leh sporting history thar siam a duh vang niin sawi bawk mah se uaithlak lama sum tuakna tha tak a nih thu khawvelin a hai lo a, mahse, October 2023 khan Brazil tan World Cup qualifier-a Uruguay a hmachhawn tumin a khupah hliam serious tak a tuar a, nikum October thlaah khelmual lut leh thei hram mah se a kirleh hnua a match hnihnaah a kaihza tha a tina leh a, kha mi hnu khan tun thlengin a la inkhel leh ta lo a, Arab team pawhin chhawr theih mang hleih loh hlawm tam si kawl reng chu tlin an inti ta bik zozai lo a ni’ang!
Neymar hian youth system-a a zikchhuahna Santos tan a hun hmasa lamah game 225 atangin goal 136 a thunsak tling a, Brazil rama hming a chher hnuah kum 2013 khan Barcelona-in an senglut ta a ni.
Spain rama season li a khawsak chhung khan match 186 khel tlingin, Nou Camp club kha La Liga title pahnih leh Champions League trophy pakhat a lakpui hman bakah Club World Cup-ah a champion-pui a; tarlan tawh thin angin, kum 25 mi a nih laiin PSG chuan tun thlenga world record la ni reng turin an senglut ta a ni.
Saudi Arabia lama a insuanchhuah hmain Paris-ah khan league title panga la hman mah se khatih laia a team-mate ropui Messi leh Suarez tihte nen meuh pawh khan Ligue 1 giants it ber Champions League title an lakpui zo lo!
Pele khuma Brazil tana goal khung hnem ber ni tura goal 78 a thun tlin hnu lawkah khup hliam buaithlak chi khan a tlakbuak zui ta tlat a, kum 2023-a a intihnat hnu khan tun thlengin ram tan a la inkhel leh ta lo.
Al-Hilal nena in\hen fel Neymar
