Al-Nassr atanga chhuah sawi ri Ronaldo!

Al-Nassr atanga chhuah sawi ri Ronaldo!
Kum 2023-a a zawm tak daih Al-Nassr nena inthen lam hawi thu champion footballer Cristiano Ronaldo chuan tunhnai khan social media lamah a tarchhuak a, a kalna tur inrinsiak boruak a alh chhuak nghal hluai!
Portuguese hian Saudi Pro League club tan game 111-ah goal 99 thun tling tawhin, Thawhtanni khan goal khung mah se a club vawn lai chu Al Fateh lakah 3-2-in a tlawmpui a, kha kha Arab club tana a inkhelh tawpna ni thei mai dawnin a lang.
Inkhelh banah kum 40 mi chuan Instagram kaltlangin a fans tana thu bengverh zet a phochhuak a, Al Nassr chhuahsan a rilruk thu leh footballer erawh la nih chhunzawm zel rih a tum thu a sawi.
Ronaldo chuan, “He bung leh chang (chapter) ka keu mek hi chu a tawp fel ta a, a thawnthu min zawt maw? Ziah mek a la ni. Mi zawng zawng chungah ka lawm e,” tiin.
Tun kartira Al Fateh laka a goal khung kha Saudi Pro League 2024-25 season-a a goal 25 thunna chiah niin, 2023-24 season-a goal 35 a lo khung tawh nen a tum hnihna leh a zawn ni bawkin tun season-ah ‘Golden Boot’ award a dawng zui leh ta a ni.
Tarlan tawh angin, kum 2023-a Arab team hausa a zawm hnu khan Thawhtanni thlengin goal 99 a thun tling a, chu’ng zinga goal 74 chu Saudi Pro League game 77 a khelh atanga a khawl tlin a ni.
Manchester United a chhuahsan hnuah Al-Nassr hi January 2023 khan rin loh takin a zawm thut a, a season kha mi kum February thla khan goal riat thunin, assist tum hnih a nei nghal a, Saudi Pro League ‘Player of the Month’ atan thlan a ni nghal pang!
2023-24 season a zawh meuh chuan a club thar tan goal 35 tehreng khawl tlingin, Saudi Pro League lamah goal-scoring record thar a siam er nghal zawt a; a hmaa record ding lai kum 2019-a Abderrazak Hamdallah lo siam tawh goal 34 chu goal khatin a khum chiah chiah a ni.
Arab club a zawm kum vek khan Al Nassr chu a vawikhatna atan Arab Club Champions Cup trophy a lakpui nghal a, title match-a an hmelma kumhlun Al Hilal an hneh lehzel kha Al Nassr tana lawmna tizualtu a ni!
Sporting CP, Manchester United, Real Madrid leh Juventus thuam lo inbel tawh Ronaldo tan Al Nassr hi a club pangana chiah niin, a team vawn tawhte hi title a lakpui mai zel a, khawvel khawi hmunah mah a buai lo!
Saudi Arabian club a chhuahsan huna a kalna tur ni thei awma an sawi pahnihte chu Lionel Messi hnungzuia USA top flight Major League Soccer team khawi emaw ber zawm emaw a club hmangaih hmasaber Sporting CP lama kirleh emaw niin media liante’n an tarlang.