Cristiano Ronaldo chuan player pahniha kim lo chungin Inrinni zan Arab Club Champions Cup final extra-time-ah goal hnih thunin Saudi club ve tho Al-Hilal lakah 2-1-in Al-Nassr a chakpui a, Gulf ram a pan hnua a title hmasaber a hlawhchhuak.
Ronaldo hian season liamta khan Al-Nassr chu title lakpui zo loin Saudi Pro League-ah pahnihna a nihpui a; Arab Club Champions Cup tournament lamah erawh kum 38 mi hian goal ruk thunin, top scorer nihna nen Saudi Arabian club a zawm hnua a title hmasaber a sualchhuak.
He tournament Saudi Arabia, Qatar, United Arab Emirates, Iraq, Morocco, Tunisia leh Algeria atanga Arab club hraw ber berte khelh niin,
King Fahd Stadium final match-ah hian star rual awmna Al-Nassr hian first half-ah goal thun theihna hun remchang hmu mawlh mawlh mah se season tawp dawna lei thar Sadio Mane, Seko Fofana leh Marcelo Bro-zovic-te’n Al-Hilal kee-per Mohammed Alowais an paltlang zo lo vek.
Second half tan atanga minute ruknaah Al-Hilal player Malcom siamsak atangin a chipui Brazilian Michael chuan goal hmahruai a tauhlut a; goal hmahruai thuntu kum 27 mi Michael hian Al-Nassr elsenna’n corner flag lamah tlanin boruakah a zuang a, Ronaldo goal thun lawm dan (Ronaldo goal celebration) ang chiahin a goal thun a lawm zui!
Chu chet dan chuan Portuguese superstar a titlawmngai niin a lang a, minute 74-ah Portugal captain hian right back Sultan Al-Ghannam chhawpsak atangin an siphurh a sut a, a zawna game nga chhung goal a khungna a ni nghal.
1-1 a nih hnu hian second half minute sarih kar danah Al-Nassr player pahnih hnawh-chhuah niin, defender Abdulelah Al-Amri leh substitute Nawaf Bou-shal-te’n red card an hmuh hnuah pawh player pakuaa khel Al-Nassr lamin goal dang chhuah belh duh loin extra time an nghak thleng a, tah chiah hian Ronaldo a inlar leh a, extra time first half-ah crossbar atanga ball sawtlet chu goal-ah chantirin, he goal hmang hian Arab team a zawm hnua a title hmasaber a hmin zui ta a ni.
Extra time second half-ah an insutna lama a hliam tawh vang ni ngeia ngaih theihin Ronaldo chuan khelmual a chhuahsan a, Saudi Pro League bul an tannaa Al-Ettifaq an hmachhawn hma ni hnih chiah awm tawha hetiang dinhmun a tawh avang hian league-ah bul a tan thei dawn em a chiang ta rih lo.
Al-Nassr tana Ronaldo title hmasaber a hmin
