Brazilian winger Angelo Gabriel chuan competitive match khelhtir miah loa an club register bu-a ziaklut ringawttu Chelsea chhuahsanin Saudi Pro-League club Al-Nassr a zawm fel a, Blues hian kum 19 mi manah pound maktaduai 19.1 an tel.
Gabriel-a hi Stamford Bridge club chuan July 2023 khan Brazilian club lian Santos atangin pound maktaduai 13-in an senglut a, season liamta khan loan-in Chelsea sister club Racing Club de Strasbourg Alsace lamah an chhuahtir a, France ram hmarchhak team tan chuan game 24 a khel tling.
October 2020 khan kum 15 leh 308 chiaha upa ni chungin Maracana Stadium ropuiah a Santos debut nghakchhuakin Fluminense a hmachhawn a, chu chuan Brazilian top flight history-a player khelmual lut thei naupangber a nihtir.
Chelsea hian han leichhuak ve hluai mah se an team tan competitive game an khelhtir lo a, contract an ziahpui laia hralhchhuah leh dan tur inremna an bilhtel hmangin Cristiano Ronaldo leh Sadio Mane khelhna Al-Nassr lamah an namliam zui leh ta mai a ni.
Sum tamna Arab rama kal intihhmuhna thli a la tleh ve reng a, Daniel Podence pawhin Wolverhampton Wanderers chhuahsanin Al-Shabab a zawm a, a man hi pound maktaduai 5 a ni.
He Portugal winger hi kum 28 mi niin, kum 2019 atang khan Wolves tan a khel a, a chhuah hian match 108-ah goal 16 a thunsak tling.
Season liamta khan a club hlui Olympiacos lamah English club chuan loan-in an chhuahtir a, tunkar Thawhtannia Saudi transfer tukverh an khar hma chiah khan Al-Shabab zawm turin an tirliam hman.
Al-Nassr winger thar Angelo
