Alcaraz-a ropui belhchhahna ni a hnai zel!

Alcaraz-a ropui belhchhahna ni a hnai zel!
Tennis ‘big four’ an tih mai Roger Federer, Rafael Nadal, Andy Murray leh Novak Djokovic-te’n mual an liam zawh hnaih tawh lama rawn vul tan mek Carlos Alcaraz chuan Grand Slam title pali a lawk tawh belhchhaha trophy lian a beisei leh mek Olympic men’s singles title a hnaih zel a, nimin khan Canadian tlangval Felix Auger-Aliassime laka 6-1, 6-1 hnehna awlsam changin Olympic men’s singles final a lut a, mipa tennis-a Olympic gold medalist naupang ber nihna chang turin vawikhat chak chiah a mamawh ta!
Semi-final lehlam result tarlan hman loha tlang tura ngaih ngheh Serb Djokovic lah chu tunhnaia a hneh hle kha a ni e!
Kum 21 mi lek ni chunga Roland Garros clay court thunun nghet hle tawh Spaniard hian Paris-ah a groundstroke pui lutuk, awihawm loh khawpa speed tha leh a net bel thiam chungchuanna a lantir kal leh mek a, talent nei tha ve tho Auger-Aliassime tan pawh khel tha kal tluang Spaniard kha ter phak mi rual a ni lo!
Spanish mipui lawm hlawh Alcaraz-a game a dik mar nalh zaih reng a, break point han hmachhawn zuau zuau tih ang reng reng hlauh tur a nei lo a, final a thlenna kawngah hian hlingin a tai chhin eih lo ti ila kan uar lutuk lo mai thei a, Roland Garros leh Wimbledon lama a hneh hnu Novak Djokovic nen final an khel leh a nih phei chuan Olympic gold chu himsa tlukah a ngaih theih awm e!
Serbian Djokovic hian semi-final lehlamah Italian player Lorenzo Musetti a hmachhawn a, khup hliam avangin fit ziktluak lo mah se tlang tho tura beisei a ni.
Alcaraz hi gold awrh tura ngaih ngheh ni bawk mah se tennis-ah hian mak deuh deuh, mi barakhaih fu fu kan hmu hnem ve tawh a, Olympic ropuina a nghak mek ti ila a sual lo ber awm e!
Women’s singles final khel tur pawh an chiang tawh a, Zheng Qinwen of China leh Donna Vekic of Croatia inbeihna a ni ang.
Ningani khan Spain tana medal beiseina pakhat Carlos Alcaraz chuan quarter-final match pakhatah 6-3, 7-6(7)-a American ninth seed Tommy Paul hnehin a Games debut-ah semi-final a lut a, tunah final thleng zui ta phawt a ni..
Alcaraz hi a idol Rafa Nadal nen doubles-ah medal dawng pha lo zawngin an tla fel tawh a, French Open leh Wimbledon title a kawl tawh belhchhah turin Olympic gold a beisei leh mek a ni.
Second seed Alcaraz hian semi-final match-ah Canada player Felix Auger-Aliassime a paltlang tih tarlan a ni tawh a; Felix hian last eight inkhel dangah Norwegian clay-court specialist Casper Ruud chu 6-4, 6-7(8), 6-3-in a hneh ve bawk a nih kha.
Serbia superstar leh men’s top seed ni bawk Novak Djokovic pawhin Greece player Stefanos Tsitsipas hnehin, semi-final pakhat zawkah Olympic hnuhnungber Tokyo champion Alexander Zverev hnehtu Italy player Lorenzo Musetti lakah fiahna a hmachhawn a, champion lai German Zverev a tlawm tak avangin Olympic men’s singles champion thar kan hmu hrim hrim phawt dawn a ni.
Mipa doubles lama Alcaraz leh Nadal hnehtu United States pair Rajeev Ram leh Austin Krajicek khan 6-2, 6-2-a Czech pair Tomas Machac leh Adam Pavlasek hneh lehin final an lut tawh bawk.