Grand Slam pali zinga ngaihhlut hlawh ber Wimbledon-ah vawi hnih champion zawn tawh Carlos Alcaraz a chak zel a, quarter-final a lut leh der tawh. Alcaraz hian pathianni zana a khingpui Andrey Rublev lakah set a hloh hmasak zet hnuin set thum a la zawn a, hnehna a chang let. Champion lai Alcaraz hian tualchhung tlangval Cameron Norrie a hmachhawn zui leh dawn.
Champion lai Alcaraz hian last 16-a a khingpui Andrey Rublev lakah bul a an chhe viau a, set khatna tirah a serve a hum zo lo nghal ringawt. Russian star Rublev hian bul a an ha viau a, 4-2 ngawtin hma a hruai hman. Awlsam taka set la hmasa tura ngaih a nih laiin a serve a hum zo bik lova, Alcaraz er letna tak a dawl lo va, 4-4 a ni hman. 4-4 a nih hnuin break nei thei an awm tawh lova, tie-break khelh a ngai. Tie-break-ah Alcaraz-a’n 5-4 in hma a hruai hman a, a service hun a ni tel bawk. Set la hmasa ngei tura ngaih a nih laiin an chesual teh tlat a, point hnih a hloh zawn. Alcaraz a break zawn hnuin Rublev hian point a hlawhchhuak zui leh a, mak leh ropui takin set la hmasa zawkah a ang ta daih.
Set la hmasa zawk a nih vangin Rublev a phur zui viau a, set hnihna tir lamah a khel ha viau. Khel ha chho viau mah se hun pawimawhah a chesual tlat thung a,, ho takin a serve a hum zo lo. Khel ha cho telh telh Alcaraz-a’n harsa lutuk lovin set hnihna a la ve ta thung. Inkhel a rei tulh tulh a, Alcaraz a khel ha tulh tulh. Alcaraz hi a service a na in, a dik thei em em a, Rublev-a’n lak ngaihna a hre hlawl lo a ni ber mai. Hun pawimawhah boruak ngam zawk leh huaisen zawk a nihna chhawr angkaiin break a nei leh mai hin a, vawi khat a lo hneh loh ve tawh Alcaraz lakah a tlawm zui a, Alcaraz hian 6-7 (5-7) 6-3 6-4 6-4 a hnehna changin quarter-final a inhlangkai zui ta a ni.
Alcaraz hian quarter-final-ah fiahna hautak zawk a hmachhawn a ngai dawn a, tualchhung tlangval Cameron Norrie nen semi-final luh an inchuh dawn. Norrie nen hian vawi ruk an inhmachhawn tawh a, Alcaraz-a’n vawi li hnehna chang tawhin Norrie hian vawi hnih hnehna a chang ve tawh bawk. Centre Court-a mipui pungkhawmin Norrie an an hle ngei dawn a, beisei ang taka la khel ha chhuak thei lo Alcaraz tan fiahna hautak a tling ngei tura ngaih a ni.
Alcaraz hmaa ding tur Cameron Norrie hian last 16-a a khingpui Nicolas Jarry lakah set hnih hloh bawk mah se 6-3, 7-6 (7-4), 6-7 (7-9), 6-7 (5-7) leh 6-3 a hnehna changin quarter-final a lut. Mipa lamah British innghahna awmchhun a ni tawh a. An tualzawlah ngei champion ngei tumin an an khawh zui nasa hle tura ngaih a ni.
