Pathianni zan khan Wimbledon 2025 mipa final khelh a ni a, inkhel hmuhnawm takah Jannik Sinner chuan champion lai Alcaraz a hneh a, ropui takin a champion.
Grand Slam-a vawi nga champion tawh Carlos Alcaraz hi kum 2025-ah vawi 24 zet chak zawn tawh a ni a. French Open-ah a champion nawn a, a vawi thum nan Wimbledon-a champion turin rin a kai em em bawk. Final-a a khingpui Jannik Sinner hi French Open final-a a hneh tak kha a nih bakah an inkarah 8-4 in hma a hruai mek bawk nen Tennis ngaihventuten Alcaraz hi champion nawn leh ngei turin an ngai deuh thup. French Open final kha darkar nga chuang zet an lo hel tawh a, champion tura rinkai zawk chu Alcaraz ni bawk mah se final hmuhnawm tak a nih erawh rin thup a ni. Alcaraz hi inrintawkna sang tak nen inlan bawk mah se chiai hauh lo leh hlauthawng lo taka inlan Sinner a dang zo ta bik lo.
Final ngaihven hlawh takah hian World No. 1 Jannik Sinner-a’n bul a tan tha a, set khatna tir lamah break a nei nghal. Break a neih nghal vangin 4-2 laiin hma a hruai hman a, awlsam taka set la thei tura ngaih a ni. Set la hmasa tura ngaih ni hman mah se Alcaraz er let na tak a dawl zo lova, a serve vawi a hum zo lo zawn a, Alcaraz-a’n set a la hmasa ta daih. Sinner hmahruaina pawt thlaa set a lak hmasak vangin Alcaraz a chiampion leh tura ngaihna a lian hman hle.
Set hmasa berah chesual mah se set dangah Sinner a chesual duh tawh lova, a hun tha neih a hlah duh tawh hek lo. Service na lo zawk ni bawk mah se a serve a hum thei zel. A serve a hum theih zel laiin set thum dangah Alcaraz hi vawi khat theuh a break tlat thung. Set hnihnaah game an inlak chhawk zak zak hnuin game pawimawh takah Sinner-a’n break pawimawh zet mai a nei a, game li hloh chungin set ala let a, champion tuma inelna boruak a nung thar leh zual.
Set thumna tir lamah Sinner-a’n break a nei leh nghal mai a, bul a tan tha leh viau. Alcaraz-a’n break let tum viau mah se a serve a hum hram zel a, a chesual duh lo. Game li hloh chungin Italian hian set a la zui leh a, champion a hnaih ta kuarh. Set dang ang bawkin set linaah Sinner-a’n Alcaraz a break leh a, dinhmun tha zawkah a ding. |um khat chu a serve hum zo lo teuh viau mah se 150-40 a nih hnuin a pawt thla thei hram a, a ding chang hram. Champion theihna hun tha neihah tha leh huai zawkin a inlan a, awlsam taka game lain a elpui lian Carlos Alcaraz lakah 4-6, 6-4, 6-4, 6-4 a hnehna changin Grand Slam ngaihhlut hlawh ber Wimbledon-ah ropui takin a champion ta a ni.
Glay leh Grass Court-ah hneh theih loh ang maia inlan a, vawi 24 zet chak tluang tawh Carlos Alcaraz chak tluang lai tihtawp a ni a. Wimbledon-ah a vawi thum nan champion zawn a tumna pawh tihthlawnsak a ni ta bawk. Alcaraz hian a elpui lian Jannik Sinner hneh thei viau mah se Wimbledon final-ah erawh a ngam ta lo thung. Alcaraz khan thahrui nghah leh ball vaw na Sinner lakah a thiam thil drop shot hmang hleithei lo. Ni danga point a hlawhchhuah fona drop shot atangin point a hloh tam a, final boruak sangah ace service ngah zawk bawk mah se double foult a nei tam zawk tlat thung. Grand Slam-a champion ngun ber Novak Djokovic a chuai tawh a, Grand Slam-a champion a harsat tawh. Jannik Sinner leh Carlos Alcaraz te hi final lianah an inhmachhawn fo a rinawm. Alcaraz hi Clay leh Grass-ah a tha viau a, hart court lamah erawh Sinner a tha viau thung. Sinner hi Alcaraz thatna Clay leh Grass-ah a tha tel viau bawk a, Indoor-ah Alcaraz aiin a tha zawk bawk. Tennis ngainatuten Novak Djokovic ang maia thiam chikim tiin an sawi zui ta hial a ni.
Tunlaia player tha fal pahnih Jannik Sinner leh Carlos Alcaraz te hi vawi 13 an inhmachhawn ta chiah a, 8-5 in Alcaraz a chungnung mek. Alcaraz hian Grand Slam title panga a la tawh a, US Open, French Open leh Wimbledon-ahte a champion tawh. Grand Slam-a Alcaraz la champion lohna awmchhun chu Australian Open a ni a, Career Grand Slam puitlin turin Australian Open-a champion a mamawh. Alcaraz-a enlpui lian Jannik Sinner hian Grand Slam title pali lain, US Open, Australian Open leh Wimbledon-ahte a champion tawh. French Open-ah a champion theihna hun tha tak a neih laiin a chesual hlauh a, Career Grand Slam a la puitlin theih loh phah. Sinner leh Alcaraz te hi an la naupang dun a, an inel zui hle tura ngaih a ni.
Ranking point
A vawi khat nan Wimbledon-ah a champion vangin Jannik Sinner hian ranking point 1200 zet a hmuh belh a, ranking point 12,030 nei mekin No 1 dinhmun a luah nghet leh zual a, Alcaraz nen an inkar a tihzau belh. Sinner-a’n ranking point 1200 zet a hmuh belh lai hian Carlos Alcaraz erawh chuan point point 700 zet a hloh ve thung. Champion thar Sinner hian Wimbledon 2024-ah khan semi-final a thleng a. Grand Slam-a semi-final thleng ten ranking point 800 an hmu a. Finalist in point 1300 an hmuh laiin champion in point 2000 an hmu ve thung. Sinner hian kum hmasa lama point 800 a hmuh a humhim bakah a champion vangin point 1200 a hmuh belh tihna a ni a. Alcaraz hian champion lai a nih vanga point 2000 atangin point 700 a hum zo ta lo tihna a ni.
Trophy leh sum
Wimbledon a champion ten mipui hmuh laia an chawi kual thin Trophy hi neih hlen tur a ni lova, mipui hmuh lai chauha an chawi kual tur bik a ni a. Centre Court bathlar atanga mipui hmuh tura an lekchhuah hnu lawkah laksakin, dah that nghal a ni thin a. Champion te hawn tur bik trophy chu te takte a siam, niin champions dinner-ah hlan thin an ni.
Wimbledon 2025-a mipa champion Jannik Sinner khan India pawisaa Vaibelchhe 34 zet a hlawh a. Pahnihna Carlos Alcaraz-ah Vaibelchhe 17 a hlawh a. Semi-finalist Novak Djokovic leh Taylor Fritz ten Vaibelchhe 9 ve ve an hlawh bawk.
Tunge Sinner?
A hming atang renga zawhna siam nghal Jannik Sinner hi August ni 16, 2001 khan Innichen, Italy-ah a piang a, kum 23-na a hmang mek. Italy-ah piang leh sei lian ni bawk mah se Monte Carlo, Monaco-ah a cheng mek thung. Feet 6 leh inches 3 a sang a ni a, thahrui a ngahin a fet hle. Kum 2018 atangin Profession Tennis a luh chilh tan. June ni 10, 2024 atangin World No. 1 a ni tan a, thla thum chhung ngawt inelna hmachhawn thei lova hrem a ni chung chungin No. 1 a ni tluang zel. Inelna lian Grand Slam-ah vawi li a champion tawh a, inelna ngaihhlut hlawh tak ATP Finals-ah champion tawh bawkin title a lak tawh zawng zawng hi 20 a ni.
Tihpalh thilthu a damdawi hman phal loh a lo hman vangin Jannik Sinner hi Australian Open khelh zawh hnu lawkah hrem a ni a, thla thum chhung ngawt hrem a nih hnuin French Open a hmachhawn a, final a lut. Champion teuh viau mah se uiawm takin a champion zo lo. French Open-a a chetsualna atangin a inzir a, puitling leh fim zawkin Wimbledon 2025-ah a inlan. A elpui lian Carlos Alcaraz ngei hnehin a champion a, Tennis thiam bik a nihzia khawvel hriatah a lantir chiang leh zual. Sinner hi final boruak sangah pawh a zia a zawi raih thei reng a, inthunnunna a nei tha hle. A cool raih reng thei hi tan a hlawh chhan a ni.
