Alex Warren ‘Ordinary’ a la Hot ber

Alex Warren ‘Ordinary’ a la Hot ber
Alex Warren hla hit ‘Ordinary’ chu Billboard Hot 100 (singles) chart-ah a No.1 a, he chart-a kar thum (a zawn ni lovin) a No.1-na a ni ta. He hla hi kar hnih a No.1 hnuah kar kalta chart-ah khan Sabrina Carpenter hla thar ‘Manchild’-in a rawn nawr sawn a, tunah No.1-ah a inhlangkai leh ta a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian kar khat chhunga all-genre US streaming (official audio & official video), radio airplay leh sales data te chu tehna pawimawh a ni.
‘Ordinary’ hian kar khat chhungin stream maktaduai 20.4 leh sales 7,000 neiin, radio airplay pawh ngaithlatu maktaduai 61.5 a la nei thei a, hei hi chart No.2 atangin No.1 a kaipui thar leh ta a ni.
Kar kalta chart-a No.1-a rawn debut Sabrina Carpenter hla thar ‘Manchild’-in stream maktaduai 21.1 leh sales 3,000 neiin, radio airplay ngaithlatu maktaduai 16.8 a la nei thei a, No.1 atangin No.2-ah a tawlh ve thung.
Chart No.1 hlui Morgan Wallen ‘What I Want’ featuring Tate McRae chu No.3-ah bawk a la awm a, Wallen hla dang, chart No.2 kai thei ‘Just in Case’ chu No.4-ah bawk a la awm a, he chart-a kar 13 chhung No.1 ni thei Kendrick Lamar leh SZA ‘Luther’ pawh No.5-ah bawk a la awm.
Morgan Wallen hla, he chart-a No.1 lo ni tawh “I’m the Problem” chu No.6-ah bawk la awmin, heti hian a zawnin kar nga chhung chu Wallen hian chart top 10-ah kar tin hla pathum tal a la nei ziah a ni.
He chart-a kar 19 No.1 ni thei, chart No.1 ni rei ber record nihrual thei Shaboozey ‘A Bar Song (Tipsy)’ chu No.7-ah bawk a la awm a, chart No.1 hlui Lady Gaga leh Bruno Mars ‘Die With a Smile’ pawh No.8-ah bawk a la awm.
Teddy Swims hla No.1 pawh lo ni taw ‘Lose Control’ chu No.9-ah bawk a la awm a, he hla hi chart top 10-ah kar 66 a lang tling ta a, he chart top 10-a lang rei thei ber record a siam a sawhnghet telh telh a, top 10 pawn lama a awm chhung nen phei chuan chart-ah kar 96 a lang tling tawh bawk.
Billboard Hot 100 chart top 10 khartu chu No.2 pawh lo ni tawh Benson Boone ‘Beautiful Things’ niin, No.10-ah bawk a la awm.