ALLAH

By Rempuia R. Lutmang
“Allah hi tute Pathian nge?” ti ta ila, “Muslim” kan ti dual ang. Kan sawi sual chiah lo; mahse, Allah hi Kristiante Pathian pawh a ni ve a, Judate Pathian pawh a ni bawk.
Engtin nge Allah chu Kristiante Pathian leh Judate Pathian a nih theiht Ih, Allah tih hi Pathian tihna mai chauh a nih vang a ni.
Sakhaw pathum kan sawi rîk tak, Juda sakhua, Islam sakhua leh Kristian sakhuaah hian Juda sakhua a hmasa ber a; a dawttu chu Kristian sakhua a ni. Isua a thiha a thawh leha vana a lawn hnu khan a zirtirte khan tih tak zetin Pathian rawng an han bawl ta a, Isua chu Pathian fapa a nih thu an tlangaupui a. A tira lamah khan Juda chauh kha Kristian an ni phawt a (Kristian tih tawngkam erawh chu a la piang lo). Juda tam zawkin an thu hril chu an huat tlat avangin hnam dang hnenah thu an hril zel a, Grik mite, Arab mite thlengin Krista zuitu an lo ni a, chu chu Islam sakhaw pian hma daih a ni.
Chutiangah chuan Arab Kristian hmaste khan Krista an zui hma daiha pathian sawina tawngkam an neih sa ‘Allah’ tih kha Krista an zui hnuah pawh Kristiante Pathian sawina atan an hmang a ni. Mizo pawhin God ti loin kan tawnga awm sa Pathian kan hmang ve ta mai ang tho hian Arab pawhin Allah tih chu an hmang ve mai a nih chu.
Mizo tawnga God an lehlin dawn khan an buai hle a, Khuavang nge kan hman ang Pathian tih kha an bûk a, a rih dan a inang thial mai si a. A tawpa tawpah chuan Pathian tih hman kha an titlu ta a. Chuti chung chuan hla thûah chuan Khuanu tih kan la hmang zui ta zel tho. “Chung Khuanu malsawmna zarah dam te’n kan tawng leh ta hlim ni” te kan ti a, “Chung Khuanu leng ruat sain inneihna a lo awm” te kan ti bawk. Arab pawhin Allah an hmang ve tho a, keini pawhin Khuanu emaw, Pathian emaw kan hmang ve mai a ni. Hun bul lama God lehlinna turah khian ‘Khuanu nge Pathian’ tih zawk awm tak a nia; mahse, ziaktu hmasate hian ‘Khuavang nge Pathian’ an ti tlat bawk si. Khuavang hi chu a nihna a chiri ru riau, a changin lei hnuaiah khua an nei a, samkhuih thlak mai maiah an khua a min hem hem mai a, tam tak an ni lehnghal vei nen, Pathian tlukpuia ngaih a har deuh (Kungawrhi thawnthu).
Thil danga kan pen thui hmain Allah lamah bawk aw. Kristian sakhua a pian hnu kum tam takah Islam sakhua a lo piang ve leh a, a sakhaw vuantute chu Arab tawng hmang an nih avangin an Pathian sawinaah pawh Kristiante hman sa Allah tho an hmang ve lo thei lo. An sakhua tidarh turin tharum an thawh a, an Pathian thu sawina pawh Arabic kher an hman thin avangin ram hrang hrangah Muslim Pathian sawina bik emaw tih tur khawpin Allah tih chu a lo darh zau ta a. Mahse, tun thleng hian Allah tih chu Muslim Pathian sawina bik a ni lo a, eng sakhua pawh ni se, Arab tawngah chuan Pathian chu Allah a ni reng.
India leh Bangladesh rama Bengali Muslimte chuan Allah tih hi an Pathian bik sawina emaw an ti chawt ang chu. Arab thlah an ni lo a, Arabic lah an thiam hek lo, an lo ti a nih pawhin a mawh lo e. US-a Sap Kristian tam takte pawhin Allah tih chu Muslim Pathian sawina bik emaw an ti ve chawt thin bawk, Sap pawh ni mah se an mâwl ve tho, thu dik hrilhtu an awm loh chuan.
Arab zingah Kristian tam tak an awm a, tunlaia Israel nena inhal tak Palestina rama cheng Paletinian-ah pawh khuan Kristian tam tak an awm. Chungho chuan an Pathian sawinaah chuan Allah an hmang a, Arabic-a Bible lehlinah chuan God tih aiah Allah tih vek an hmang. Keini pawhin God tih aiah Pathian tih vek kan hmang ang chiah hi a ni. Indonesian tawnga lehlin Kristian Bible-ah pawh God hi Allah tih tho a ni.
Muslim lehkhabu sawi kai ta ila, an Quran hi Sap tawnga an lehlin chuan, Allah tih aiah God tih an hmang ve leh thung. Quran English version nei chuan God tih hlirin a inziak tih an hre thei ang. Pathian tiin hawrawppui P kan hmang a, Sap pawhin God tihah hawrawppui G an hmang bawk a, Arabic Bible-ah pawh Allah tiin A hawrawppui a ni a; chutiang chiah chuan Muslim sakhaw lehkhabu Quran pawh English version a nih chuan God chu hawrawppui G tho an hmang. Pathian sawinaa a hawrawp hmasa ber hawrawppui hi Kristiante Pathian ziah dan bik a ni lo.
Heti hian a tawi zawngin han sawi belh leh hlek i la, “Kristiante biak hi Allah a ni lo, God alawm” tih chu “Kristiante biak hi Pathian a ni lo, God alawm,” tih ang chauha awmze nei lo a ni. Hnam tinin tawng hrang kan nei thlih thliah a, chuta kan tawng ang zel chuan Pathian hi kan sawi mai a lo ni.
Muslim sakhua leh Kristian sakhua hi a inang e, tihna lam a ni lo; Allah hi Arab-mi, Arab tawng hmang tan chuan Pathian tihna a ni tih ka han sawi deuh duah a nih chu. Arab tawng Arabic hi sakhua a ni lo a, tawng a ni. Chumi hmangtute chuan an Pathian theuh kha Allah tiin an sawi vek a, a eng sakhua nge tih lam a hril lo.
A tawpna atan Palestinian Kristian, Theodosius Atallah Hanna, Archbishop of Sebastia from the Greek Orthodox Patriarchate of Jerusalem thu sawi tawi te hi chhiar tlang teh ang u: I am a Palestinian Christian. We also say “Allahu Akbar” which normally hear from a Muslim, as well as “Insha Allah”, “Ma Shaa Allah” and “Alhamdulillah”. This is simply because Arabic is our language, and Arabic word for “God” is “Allah” whether you are a Christian or a Muslim. Hei hi eng vanga sawi nge a nih ang aw, mi tam takin “Allah” tih hi Muslim sakhaw Pathian sawina bik emaw an tih ve vang a ni ngei ang ti rawh u maw.
A la tawp leh chiah si lo. Miin Sap tawnga inthlahrung miah loa “God is good” an tihin, thawk la miah loin “all the time” kan lo ti dial dial thei a, Hebrai tawng “Haleluiah” leh “amen” te pawh tim hauh loin kan hmang a, chutiang bawk chuan “Allah” tih te, “Alhamdulillah” tih te hi kan awmna hmunin a zir chuan ngaihngam takinkan hmang thei reng tih kha i hre theuh ang u. Sap tawng hi Kristian sakhaw ta bik a ni lo a, Arabic pawh Muslim sakhaw ta bik a ni lo e.