Atletico Madrid chuan pound maktaduai 81.5 thleng hawlh thei tura Manchester City forward Julian Alvarez lei turin thutlukna an siam fel.
Kumin nipui lai Copa America tournament-a Argentina champion-puitu Alvarez hian kum 2022 khan an ram club lian River Plate atangin Premier League champion a zawm a, City player hralhchhuah tawh zinga to ber a ni dawn ta a ni.
Kum 2022 khan Raheem Sterling manah Manchester City chuan Chelsea hnen atangin pound maktaduai 50 an dawng a, kha kha player hralhna mana an sum ruh hnem ber ni rengin Argentine manin record a rawn khum dawn ta a ni.
Julian Alvarez manah City hian La Liga club atangin sum hmahruai pound maktaduai 64.4 (75m euros) an dawng phawt ang a, a hnu lamah an boruak awm zel dan azirin pound maktaduai 17.1 (20m euros) an la dawn belh thei ang.
Alvarez hian 2024 Olympics football-a Argentina dinhmun avangin a hma hunah thutlukna a siam mai thei rih lo a, karliamta Zirtawpnia Games thlengtu France laka an tlawm hnu khan Spain pan turin thu a titlu ta a, mimal inremna erawh an la sawifel lo.
Manager Pep Guardiola chuan kum 24-a upa Alvarez chu la kawl chhunzawm a duh thu kumin August thlatir mai khan sawichhuakin, Spaniard chuan season thara a ruahmannaah Argentine a telh tih a sawi a, mahse, an zavaia lungrual tlanna angin thutlukna an khawrpum tih a tarlang tel.
River Plate atanga pound maktaduai 14.1 leka an lakchhuah Argentine hian Guardiola team tan match 106 a khelhah goal 36 a thun tling tawh a; Etihad-a a season hmasaberah khan Treble a hlawhchhuak nghal a, kha mi kum vek khan season laihawlah Argentina chu 2022 World Cup champion a nihpui bawk.
Atletico hian Chelsea midfielder Conor Gallagher lei turin a man an chhiar zat an ngam tih an nemnghet tawh bawk tih an tarlang.
Alvarez manah Atletico leh City inrem
