Alzheimer damdawi thar hlawhtling?

Damdawi thar donanemba chu Alzheimer natna beihletna kawngah danglamna siamtu ni thei ngei tura ngaih niin khawvel huapa enchhinna neihah hriatrengna hlohna thlenna nasa takin a tihniam thei tih finfiah a ni.
He antibody medicine hian Alzheimer natna veitirteah dementia thlen thei thluaka protein inchhekkhawl te chu a nuaibo thei a ni.
A tihdamna erawh a ni lo chungin nasa taka a nasa tur a ven theih avangin Alzheimer enkawlna kawngah hmasawnna nasa tak thlentu tur tiin journal JAMA te chuan an tarlang a.
He damdawi hi Alzheimer disease veiteah chauh thawk thungin dementia chi dang vascular dementia angah te chuan a tha chuang lo tia sawi a ni.
Clinical trial neihnaah he damdawi hian Alzheimer natna nasa zel tur chuan nasa takin a timuang thei tih hriatfiah niin he natna vei ten nitin hun an hmana chaw ei an theihnghilh ang te chu an theihnghilh loh phah tih finfiah a ni bawk.
Enchhinna neih zinga tel chu kum 80 a upa Mike Colley niin UK a cheng niin nitinin he damdawi hi London a clinic ah a la ziah a, a chhungte chuan ‘mi vannei ber zingah a tel’ tiin he damdawi a ei chungchang hi an sawi a ni.
Mike leh a chhungte chuan a hma chuan hriatrengna lamah harsatna neiin thutlukna siamna kawngah a buai an ti a, mahse, he damdawi a ei hnuah danglamna nasa tak a nei zui an ti a.
A fapa Mark chuan a tirah chuan a pa natna neih avanga harsatna an tawh thu sawiin, “Engmah hrethiam mumal lova nitin hun a hman hmuh chu a harsa a ni. Mahse, tunah chuan he damdawi avang hian nasa takin danglamna amahah a thleng a ni” tiin a sawi a. Mike pawhin, “Nitinin hmasawnna ka neiin ka inhria” tiin a sawi bawk.
Donanemab hi Eli Lilly te siam niin company dang Eisai leh Biogen tena an siam lecanenmab nena hnathawh dan inang tak niin lecanemab hian tun hnai lawkah Alzheimer nasa tur an dan theih thu an sawi vangin khawvel huapin headline an lo siam tawh a ni.
Mahse side-effect nei lo an ni lo va, donanemab trial a tel hmun thuma thena hmun khatte chuan thluak vung an neih phah thung a, mahse, awlsam tea enkawl dam nghal mai theih a ni thung.
Alzheimer damdawi tho aducanumab tih chu tun hnaiah a him tawk lo tiin European regulators te chuan an hnawlsak thung a ni.
Donanemab trial neihnaah hian researcher te chuan mi 1,736 lai zirchianna neiin heng mi te hi kum 60 atanga 85 inkar an ni a. Chuta tang chuan he damdawi hian awmzia a nei ngei tih finfiah a ni ta a ni.