UK leh Belgium scientists te chuan Alzheimer natna veite thluak cell thih dan an hmuhchhuah thu an sawi.
Alzheimer natna veite chu thluak cell thih vang niin a chhan leh vang hriatfiah theih loha awm reng a ni a.
Mahse scientists te chuan journal Science a an thil hmuhchhuah an ziahah thluaka protein pangngai ni lo inchhek khawl ‘necroptosi’ tih chu cellular suicide ang tiin an sawi a.
He an thil hmuhchhuah hi ‘cool’ tih leh ‘phurawm takzet’ tia sawiin Alzheimer natna enkawlna lamah ngaihtuahna thar a siam thei dawnah an ngai a ni.
Brain cell a neurons tih hloh chu Alzheimer thlentu niin hriatrengna hlohna a thlen a.
Alzheimer veite thluak chhung lamin hmu a nih chuan abnormal protein chikhat amyloid leh thau te a inchhekkhawl teuh tiin an sawi a.
Scientists te chuan heng thil pahnihte inkaihhnawih dan an hrefiah thei lo va. Hei vang tak hian UK a Dementia Research Institute, University College London leh KU Leuven, Belgium te chuan hrefiahin an insawi ta a ni.
An sawi dan chuan neurons karah abnormal amyloids chu inchhekkhawlin chu chuan brain inflammation neurons-in a duh loh em em chu a siam ta a ni. Chu chuan internal chemistry chu a thlak danglam ta a ni tiin an sawi a.
Thau inchingchivet vangin brain cells chuan molecule chikhat (ME3) chu tichhuakin chu chuan necroptosis chu a tihlum ta thin a ni. Necroptosis chu kan taksain cell tha lo te paihchhuaka a thar te siam a nih theih nana thawktu pawimawh tak a ni bawk.
Scientists te chuan MEG3 an dan chah hnuah brain cell te chu chhanhimin an awm thei ta tiin an sawi a. “Thil hmuhchhuah ngaihvenawm zet mai a ni,” tiin Prof Bart De Strooper, UK’s Dementia Research Institute chuan a sawi a.
“Tunah chuan a tum khat nan eng vangin nge Alzheimer’s disease neite neurons a thih tih kan hrefiah thei ta a ni. Kum 30-40 chhung vel zet hriatfiah tuma kan beih tawh a ni a, tun thlengin tute mahin a mechanism an hrefiah thei lo a ni,” tiin a sawi bawk.
Zirchianna an neihah mihring thluak cell-ah genetic khawih danglam chaichim thluak chu an dah a. He chaichim hi abnormal amyloid tam tak pechhuak thei tura siam a ni.
Tun hnaiah thluak atanga amyloid pechhuak thei damdawi siam chhuah a ni tawh a, chungte chu brain cell tichhe zel thei tura invenna lama inenkawlna hmasa ber a ni bawk.
Prof De Strooper chuan MEG3 molecule dan chah chuan brain cell thi zel tur a veng thei tih finfiahna chuan ‘damdawi thar siamna lamah kawngthaer a sial dawn a ni’ tiina sawi a. Mahse, hun erawh a la duh dawn a ti thung.
Prof Tara Spires-Jones, University of Edinburgh leh president of the British Neuroscience Association chuan ‘thil lawmawm tawp’ tiin a sawi bawk.
“Alzheimer research lama kan tlakchham lai ber mai hmuhfiah a ni ta a, he thil duhawm tak hian hma lam min pantir nasa dawn a ni,” tiin a sawi bawk,
Chutih rual chuan Alzheimer enkawl nana thil tha dik tak a ni em tih hrefiah tur chuan kawng tam tak paltlang a la ngai ang tiin a sawi bawk a.
Dr Susan Kohlhaas, Alzheimer’s Research UK pawhin thil lawmawm tak a tih rualin mahse thil sawi thui thei turin a la hma lutuk, tiin a sawi bawk.
Alzheimer natna thlentu hmuchhuak
