Rev.R.Laldawngliana
Chawlhhmun
Bible: Philippi 2:7 Mihring anga lo awmin, bawih angaha a insiam a, amah leh amah a intitlawm ta zawk a ni.
Isaia 43:25 Kei, keimah ngei hi, keimah leh keimah avang ngawta in bawhchhiatnate thai bo thintu chu ka ni, in sualnate pawh ka hre reng lo vang.
Kan thupui : ‘Amah leh amah intitlawm ta zawk a’ tih thu hi Paulan Lal Isua chungchang a sawina thu atanga lakchhuah a ni a. Puala hian he thu hi engtia sawi mai thei nge a nih a, eng nge a sawi chhan tak hi kan hriat chian a pawimawh hle a ni. Tin, ‘Amah leh amah a intitlawm ta zawk a,’ a tih hi tu a sawina nge ni a? tih hi inzir ho dawn teh ang. Mahn kohhran thurin mil tur emaw, mahni kohhran thurin nena inrem tura chhui lovin, Bible thu nen a inmil thei em tih ngun takin i’n zir teh ang u.
Amah leh amah tih awmzia:
Amah leh amah tih chu mi dang tel ve lo, tu mah inrawlh ngai lo, mi dangin tihtlawm luih emaw, tihtlawmtir emaw ni lo hi ‘amah leh amah a intitlawm tak zawk a,’ tihin a kawh leh a awmzia chu a ni. Amah leh amah tih ni na na naa mi dang teltir tum tlat chu buaina a ni. Mihring mahni inthat(Suicide) ni reng si a, mi dang tel ve tura rinhlelhna chuan buaina lian zawk a thlen thin.
Eng vangin nge Lalpa Isua kha amah leh amah a intihtlawm? Eng nge a chhan, eng atan nge?Paulan Philippi khuaa mite a hrilh dan chuan kan Lalpa Isua Krista, amah leh amah a intihtlawmna chhante chu hetiangin min hrilh a ni.
i) Mi tin vana mite, leia mite, lei hnuaia mite (Tuifinriat chhung leh thlana awm te) an thingthit nan leh Pa Pathian tihropuina turin. ii) Isua Krista chu Lal a ni, tiin lei tinrengin a puan nan.
Eng vanga amah leh amah intitlawm ta nge a nih?: Pathian Jehova a nihna dik tak chu;
i) Lei leh van siamtu a ni (Gen.1:1; Isa.43:24; Joh.1:3;Kol 1:16,17). Engkimtitheia a ni (Gen.17:1;
28:3;35:11;Num.24:4;Thup.1:8;4:8 etc) Engkimtitheia tih hi Bible-ah vawi 52-kan hmu. Pathian Chungnungbera a ni (Gen.14:18;19; Sam.7:17;TT 7:48;Heb.7:1) Chungnungbera tih hi Bible-ah vawi 47 a lang. Lei leh vana thuneihna zawng zawng neitu (Matt.28:18) Lalna leh thuneihna zawng lu a ni (Kol.2:10).
ii) Amah chu Pathian ropui tak, mihring mitin a hmuh theih loh khawpa ropui a ni. A hmel chu ni sat vanglai ang a ni a, a hmel chu Kawlphe ang a ni ( Exo.33:20; Dan.10:6,Matt.28:3; Thup.1:16).
Amah leh amah a intihtlawm chhan chu:
Chhandam ngai leh chhandam mamawh mihringte chu; keimahni leh keimahni inchhandam thei kan awm lo.
Isaia 64:4-6-ah, ‘Hmasâng ata tawh miten, nangmah chauh lo chu, anmahni nghaktu atân thawhsak thintu Pathian an hre ngai si lo va, bengin an hre ngai hek lo va, mitin an hmu ngai hek lo. 5 Nang chuan, hlim taka awma fel taka titu, i kawngte nangmah hre reng thintute chu, i hmuak thin a: ngai teh, nang i thinur a, keinin thil kan tisual a: chungah te chuan rei tak kan lo awm tawh a, tichuan chhandamin kan la awm thei ang êm?:6 Mi bawlhhlawh angin kan lo awm ta vek si a, kan felna zawng zawngte pawh silhfen bawlhhlawh ang a ni a: kan zain hnah angin kan vuai thin a; kan khawlohnate hian thli angin min leh bo thin.” tih a ni a. Tu mah hrethiam reng an awm lo, tu mah Pathian zawng reng an awm lo, a ni lo lamah an peng ta vek a, eng maha tlaktlai lovin an lo awm ta vek a, tu mah thil tha ti reng an awm lo, pakhat te mah an awm hauh lo.” tih a ni bawk. Hetiang hi mihring dinhmun a nih si avangin, min chhandam thei awm chhun chu Chhandamtu Isua Krista hi a nih avangin (Lk.2:10; Tita 2:12,13) amah leh amah a intitlawm ta zawk a ni. Lalpa fakin awm rawh se.
Pathian chu Hmangaihna a nih angin (I Joh.4:8,16). Lei leh van siamtu, Engkimtitheia, Chungnungbera leh lalna leh thuneihna zawng zawng lu nihna neitu khan, heng zawng zawng a nihna chu inngaihtlawmnaa hliahkhuhin amah leh amah intitlawmin nang leh keiin chhandamna kan chan theihna turin kraws-a thihna tuarin min rawn tlan a ni. A hmangaihna hi a thukin a va ropui em!! Ai kal a tir lo va, aiawh pawh a tir lo va, amah leh amah(Pathian Isua Krista) ngei chu a intitlawm ta zawk a ni.Isaia 43:25-a ‘Kei, keimah ngei hi, keimah leh keimah avang ngawta in bawhchhiatnate thai bo thintu chu ka ni, in sualnate pawh ka hre reng lo vang,” a tih nen pawh Phil.2:7-thu hi a inmil thap a ni.
Amah leh amah intitlawm turin tu nge a nih?
Amah leh amah intitlawma chu mihrinna lamah chuan Pathian Fapa tih a ni. Pathian atanga chhuak a nih miau avangin, ‘Pathian Fapa an ti ang,’ tih a ni (Lk.1:35). Adama atanga chhuak chu nise Pathian Fapa tih a ni lovang a, Adama fapa tih a ni ang. Tisa lamah chuan a nu Mari pasal Josefa fapa tih a ni. Amah leh amah intitlawma hi Pathian dik tak, lei leh van siamtu mai ni lo, a thil siam zawng zawng chunga thuneitu leh lalber a ni. Chu chuan amah leh amah intitlawm turin mi dang a mahmawh lo va, mi dang an awm lo va, amah leh amah intitlawma hi min chhandam theitu awm chhun Pathiana ngei chu a ni a, a hming chu Isua Krista a ni. Chu hming chu hming zawng zawnga hming chungnungber leh min chhandam theitu hming awm chhun a ni( TT 4:12;Phil.2:11).
Amah leh amah a intihtlawm hi a tawk em?
i) Ani chu lalna leh thuneihna zawng zawng lu a ni. Kol.2:10. Lalna leh thuneihna zawng zawng lu a nih chuan, amah leh amah intihtlawm theihna thuneihna a nei tihna. Mi dangin tihtlawmtir emaw, intitlawm tura thupek a ngai hran lo. Lalna leh thuneihna zawng zawng lu a ni miau va. Titlawmtu dang an awm a ngai lo va, amah leh amah a intihtlawm hi a tawk.
ii) Amahah chuan Nunna a awm, chu nunna chu mihringte nunna a ni. Joh.1:4. Amahah nunna a awm miau avangin, nunna kan neihna turin amah leh amah a intitlawm hi kan tan a tawk. Ti tlawmtu dang an awm a ngai lova, amah leh amah intitlawm turin thu a nei si a.
iii) Amah chu Nunna siamtu a ni. Nunna Siamtu chu in that a (TT 3:15) Nunna Siamtu ber chuan kan nunna turin amah leh amah a intitlawm a ni. Nunna min pe turin min petu dang an awm a ngai lo va, amah leh amah hiannunna chu min pe thei a ni.
iv) Amah avangin kan nung, kan che a ni si a(TT 17:28) Nunna Siamtu leh pe theitu chuan amah avanga kan nuna kan chet theih nan amah leh amah a intihtlawm a ni.
v) Amaha rinna nghattute chu pakhat mah thiam loh changin an awm lovang (Sam 34:22) Mi dangah ni lo,
Amahah (Isuaah) rinna nghah chu a tawk a nih chu.
vi) Amahah chuan engkim siam a ni(Kol 1:16) Engkim a zain ama siam a ni. Thil siam zawng zawng hi ama siam loh eng mah a awm lo (Joh.1:3). Thil zawng zawng siamtu chuan a siama ten chhandamna kan chan theih nan amah leh amah a intitlawm ta zawk a ni.
vii) Thawhlehna leh Nunna chu a ni (Joh.11:25)Thawhlehna thazual kan chana nunna kan neih theih nan amah leh amah a intitlawm ta zawk a ni.
viii) Lei leh vana thuneihna zawng zawng a hnenah pek a ni tawh (Matt.28:18) Amah aia lal leh thuneitu zawk an awm lo va, chuvangin, chhandamna kan chan theihna turin amah leh amah a intitlawm ta zawk a ni. Chuvangin, amah leh amah intitlawma hi Pathian Isua ngei hi a ni. Tin, Paula chuan, ‘Amahah chuan in lo famkim ta bawk a’(Kol.2:20), a ti a, ‘Amahah chuan kan tlanna kan hmu,’( Kol 1:14) a ti bawk a ni.
Pathian chu hmangaihna a ni a, Engkimtitheia leh Chungnungbera, Lalna leh thuneihna zawng zawng lu a ni a. Pathian mizia chu a mite min hmangaihna vanga aiawh(Ai kal) tir chi a ni lo. Mihringte min hmangaih hle sia, mahni inpe si lova, mi dang kaltir daih chu hmangaihna tluantling a ni ngai lo. Chuvangin, amah leh amah intlitlawmin, mihringah a lo piang a, chu mihring anga a lo pian tur thu chu amah ngaihtuahna leh, a lo ruahman tawhsa vek a ni(I Kor.2:6-8)Chu thua a lo ruahman tawh sa chu, Johana 1:14-ah, “Thu chu tisaah (Fapaah) a lo chang a, kan zingah a awm ta a, Pa fa mal neih ropui angin a ropuzia kan hmu,’ tih a lo ni ta a ni. A mite min hmangaih em avangin, mi dang emaw, zawlnei emaw, Puithiam emaw tir lovin, amah leh amah a intitlawm a, thi khawpa hial thu zawmin a lo awm a ni.
Tu dang nge kan la ngaih ang?
Amah leh amah intitlawma hi chhandamtu awm chhun a ni(Isaia 45:20). Tita 2:11-13-ah, ‘Mi zawng zawng hnenah chhandamna rawn thlenin Pathian khawngaihna a lo lang ta si a, beiseina lawmawm-kan Pathian ropui tak, Chhandamtu Isua Krista ropuina inlarna chu- nghakin, Pathian ngaihsak lohna leh khawvel chaknate bansanin…’ tih a ni. Jehova kha Chhandamtu awm chhun a nih sia, mi dang chhandamtu an awm loh chuan, ‘Chhandamtu Isua Krista ropuina..’tih hi Pathian Isua ngei a ni tih a chiang a ni. Chuvangin, ‘Amah leh amah intitlawm ta zawk hi Chhandamtu Pathian ngei hi a ni tih hi lungawi taka pawm mai hi kan tih tur a ni. Chhandamtu dang beisei leh rin tur zawn hi amah, Pathian Isua rin lohna a ni. Chuvangin, ‘Ani chu ka ni tih in awih loh chuan in sual nei rengin in thi mawlh ang’(Joh.8:24) tih hi Lal Isua pawhin a lo sawi reng ni. Engah nge amah leh amah chu thenhran tal kan tum thin le?Mi thenkhat chuan kan rin dan hi kan chiang lo va, kan sawi dan leh kan rin dan hi Bible zirtirna nen a inkalh tih pawh kan hre lo. |henkhat chuan kan thurin angin kan sawi fiah thiam lo va, kan sawi fiah thiam lohna chu a ropuinaah kan puh lawi si. Paula chuan, ‘Ka rina chu ka hria,’(II Tim.1:12) a ti a. Kan rina hi kan hre chiang lova, kan hriat chian loh ang bawkin kan sawi chiang thei lo bawk a ni. Bible zirtirna anga Pathian pakhat chauh ringtu nih loh kan hlauva, mahse chutianga rinna nei nih kan duh laiin, kan thurin kalh ringtu nih kan hlau leh si a, chuvangin, Pathian pakhat chauh ringtu nih duhin kan thurin chu a changin kan thenfin a, kan ngaihtuah chiang a, ni theiin kan hre lo va, kan fin darh leh thul a nih hi. Kan Pathian tan pawh awm dan thiam a har viau mai awm e. Amah leh amah intitlawma hi Pathian dik tak a ni tih hi thudik leh kan pawm tur a ni a. A dang an awm lo, Hmangaihtu chuan a hmangaihzia lantir nan mi dang tirh hi a lungrem zawng a ni lo va, amah leh amah intihtlawm hi a mize dik tak zawk chu a ni e. Lalpan malsawm rawh se.