India a hausa ber, khawvel mihausa zual top 10-ah pawh lang pha Mukesh Ambani fapa Anant Ambani leh Radhika Merchant te chu July ni 12 hian an innei dawn ta a, mo lawmnaah khawvel huapa zaithiam lar Drake, Adele leh Lana Del Rey te an perform dawn niin report a awm leh ta tlat mai.
Anant Ambani leh Radhika Merchant te innei tur hi March thla atang khan mo lawmna hmasa an lo nei tan tawh a, Jamnagar, Gujarat-ah India milar rual ko khawmin, Bollywood star, kei ka ni inti chin chu an tel emaw tih tur khawpin milar an fuan khawm a, khawvel mihausa Bill Gates leh Facebook neitupa Mark Zuckerberg te pawh Ambani khualtha zingah an tel a, zaithiam lar Rihanna pawh Ambani chhungkaw sum thil tihtheihna hmangin Jamnagar stage-ah a lo perform ve zak zak tawh kha a ni.
Jamnagar hnuah hian June thla khan Mediterranean tuipuia, nuamtawlna lawng lian hmangin ni li chhungin pre-mo-lawmna an nei leh a, hetah pawh hian Katy Perry an zai tir leh thei tlat.
June ni 12 hin Mumbai-ah Anant Ambani leh Radhika Merchant te hi an inkutsuih dawn ta a, mo lawmna pawh ropui eltiangin an nei zui leh dawn a, hetah hian tunlai rapper hriathlawh ber zinga mi Drake leh British zaithiam lar zet mai, Adele leh US singer Lana Del Rey te an chaw lut leh dawn ta a ni.
Inneihna ‘Shubh Vivah’ chu July ni 12-ah an nei a, July ni 13-ah ‘Shubh Aashiwad’ nei lehin, July ni 14-ah ‘Mangal Utsav’ (wedding reception) an nei leh dawn a ni.
Ambani mo lawmnaah Drake, Adele leh Lana Del Rey perform dawn
