Aizawl Municipal Corporation office Thuampuiah Taxation department chuan Nilaini, April 24 atang khan an site office an luah tan a, hei hi Aizawl mayor Lalrinenga Sailo leh Taxation department hotute ruahman a ni.
Site office-ah hian assistant commissioner of State Tax H Lalramsanga chu ‘GST facilitator’ niin, kartin Nilaini leh Ningani ah a thu thin anga, state tax officer (STO) pakhatin a pui ang. Site hi Nilaini khan hawn a ni.
AMC hnuaia hna chi hrang hrang (works contract /supplies adt.) thawktuten chhiah an pek turte awlsam zawka an pek theih nan Taxation site office hi siam a ni a. Tax official-te hian AMC hnuaia hna chi hrang hrang thawk, chhiah pek tur neite an lo pui thin ang. Hei hian Goods and Services Tax (GST) leh Profession Tax a huam anga, a tul dan angin GST registration dil duhte pawh an pui thin dawn a ni.
GST hi contract hna leh material supply chi hrang hrangah pek a ngai a. Kum khat chhunga cheng nuai 10 (service ah) leh nuai 20 (bungrua /goods) laluttute chuan GST registration neiin GST an pek a ngai a ni. Hei hian works contract service leh material supply a huam a, chhiah pek loh hi na taka hrem theih a nih avangin chhiah petute harsatna sukiang tur leh buaina an pumpelh theih nan he ruahmanna hi siam a ni.
AMC-ah Taxation site office
