ZPM chu state-ah an sawrkar a, thil man hrang hrang an tipung a. AMC-ah an sawrkar leh chuan chhiah chi hrang hrang an tipung leh dawn tih Congress hruaitu Zodintluanga chuan a sawi.
Ningani khan Mizoram Pradesh Mahila Congress Committee Gen. Hqrs chuan political training an nei a. Hmanpuitu zing ami MPCC advisor Zodintluanga chuan, AMC chu MNF-in an din nia an sawi chu, AMC Act chu an siam ve mai a, Municipal pian tir tumna tak tak a awm lo tih a sawi.
“Kum 2008-a Congress sawrkar a lo pian khan, Municipal din a nih theihnan a rules duangin theihtawp kan chhuah a. AMC hi Congress kutchhuak liau liau a ni. Tun Municipal-ah hian Congress hi Aizawl mipui tan a sawrkar ngei ngei a ngai,” a ti.
ZPM chu an sawrkar hnu ah thil man hrang hrang ti toah puhin, “AMC-ah ZPM kan sawrkar tir a nih chuan, chhiah chi hrang hrang an tipung leh dawn. Property tax pawh an tipung ngei dawn,” a ti.
UD&PA minister hlui Zodintluanga chuan, SASCI-ah North East State dangten vaibelchhe sing hnih sing thum chuang an hmuh lain, Mizoram chuan vaibelchhe 100 chiah a hmu tih a sawi a. Sawrkar laipui pawhin sumah a ring zo loa, chuvanga state dang aia min pe tlem an ni tih a sawi.
AMC-ah MNF sawrkar rorel dan chu mipuiin an hria tih sawiin, “Mipui tan harsatna tam tak an siam a. Thlantlin nawn tlak an ni lo,” a ti.
Aizawl khawpuia hmasawnna ruhrel lian zawng zawng chu Congress kutchhuak vek a ni MPCC hruaitu hian sawiin, tui hnianghnar taka kan neih theihna tura phase II buaipuitu chu Congress a ni a. |halaite tan infiamna hmunhma chi hrang hrang an buatsaih a, Aizawl tan leh Mizoram tana Congress hnathawh chu vawikhata sawisen mai chi a ni lo tih a sawi.
AMC-ah ZPM a sawrkar chuan chhiah hrang hrang tipung ang – Zodintluanga
