AMC budget vbch. 112.17 pharh
Aizawl Municipal Corporation chuan 2025- 2026 atana sum hman tur ruahmanna siamin, cheng vaibelchhe 112.17 a ni a, kum kalta aiin nuai 300-in a tlem.
Ni hnih awh tur Aizawl Municipal Corporation (AMC) Board of Corporators (BoC) thutkhawm chu mayor Lalrinenga Sailo kaihhruaiin Ningani khan neih tan a ni a. Kum 2025- 2026 atana AMC Budget estimate pharh a nih bakah AMC hmalakna hrang hrang report ngaihthlak niin, property tax khawnna tura zone revision neih a ni bawk.
Executive corporator (Cash & Accounts) Lalringliana’n Budget Estimate 2025- 2026 hi pharhin a sawifiah nghal a. 2025-2026 atana AMC Budget Estimate hi cheng vaibelchhe 112.17 niin, Lungleia municipal thar piang nen, 15th Finance Commission grant insem a lo tul tak avangin, kum kalta aiin nuai 300-in a kiam a. Sawrkar laipuiin a beisei angin an thawhchhuah ve liau liau (own source of revenue) erawhin pun lam a pan ve zel chu thil lawmawm tak a ni tih a sawi.
He budget hi tun AMC term atana budget estimate an siam hnuhnung ber tur a ni a. AMC budget inrelbawl dan chu a tha hle tih Lalringliana hian sawiin, “Budget atanga zaa 12.68 chauh hi elected corporators leh thawktute hlawh kaihhnawih atana hman tur a ni. AMC inrawlbelna zawng zawng – elected corporators leh thawktute hlawh, local council lawmman leh a kaihhnawih, medical reimbursement leh office inrelbawlna hrang hranga senso turah zaa 20.17 dah a ni a. AMC budget zaa 79.83 hi mipui tana tangkai leh hmasawnna hna (development works) thawhna atana hman a ni dawn,” a ti.
Budget estimate hi vawiin – March 21 hian sawiho a ni ang a, pawm tum a ni ang.
BoC thukhawm hian 15th Finance Commission recommendation bawhzuina atan property tax zone a ennawn a. Zone rate tidanglam loin, veng thenkhat awmna zone siamthat a ni.
AMC budget:
8 AMC-in Grant hrang hrang a dawn tur leh Property Tax a beisei anga a hmuh theih chuan 2025- 2026 sawrkar kum chhungin Corporator Ward Development Fund atan cheng nuai 68 theuh ruahman a ni.
8 Domestic/ community water reservoir (tui dahkhawlna) scheme leh Solar Rooftop Scheme kalpui thar a ni dawn.
8 Budget atanga 10.25% hi AMC-in a thawhchhuah tur a ni a, 67.41% hi 15th Finance Commission grant atanga beisei niin, 22.34% hi state sawrkar atanga grant hmuh beisei a ni.
AMC budget vbch. 112.17 pharh
