AMC election hun sawn hi…

State Election Commissioner Dr H Lalthangliana chuan nimin khan thuthar thehdarhtute hnenah, Aizawl Municipal Corporation inthlanpui neih hun tur chu kumin 2026 April – May chho lamah a ni dawn tih a sawi a.
AMC term hi March ni 1, 2026-a tawp tur a ni a, dan pangngai ang chuan term kal mek a tawp hma ngeia inthlan process hi tihfel vek tawh tur a ni. AMC term kal mek hi polling date chu February 16, 2021 kha a ni a; February ni 18, 2021-ah vote chhiar a nih kha.
Tun tuma AMC election hun sawn a nih chhan election commissioner-in a sawi dan chuan, February thlaah budget session neih a ni dawn a, sawrkar kum tawp khar a hun dawn bawk nen, hengah hian a buai ber chu sawrkar hnathawk an ni, tih te; LADC inthlanah EVM hman a ni a, election commission danah EVM hi hman a nih atanga ni 60 chhung chu khawih chet/ nawhreh theih a ni lo a, tih te; AMC inthlan atana hman tur electoral roll siam that hi a behchhanah 2026 January 1, tih a ni a, January 7 khan an inpeih fel chauh a, a chawpchilh hle, tihte a ni a. Corporator-te term a tawp hunah AMC hi administrator/ caretaker kutah an awm ang a, sawrkarin municipal commissioner emaw district bawrhsap emaw, a duh zawng dang pawh a ruat thei, tih a ni bawk.
AMC inthlan thar a hun leh tak avang hian state election commission lam chuan a lo inbuatsaih lawk nan Women Reserved Seats 6 tur thumvawra zawnna (draw of lots) pawh May ni 30, 2025 khan a lo nei fel diam tawh nghe nghe a; khatih lai khan, term dang ang bawka a hun taka election buatsaih theih loh palh hlauhthawnawm thu sawi rik a awm lo a.
Term hmasaah pawh election process leh assembly budget session a innangching a, election process a buai phah lo a, tun tumah hian election kalpui remchan lohna khawpa thil thleng liantham (disaster etc) dang a awm bawk si loh avangin, ‘enga ti ta mai nge?’ tih chu, state election commissioner-in a chhan leh vang a sawi hre reng chunga zawhna awm thei a la ni cheu awm e.
Election hun sawn chungchangah hian, SEC lamin ‘sawrkar lai a inrawlh lo’ a tih lai leh, a hun taka election neih theih loh chhan a sawi tawh lai hian, “a hun taka election buatsaih thei lo leh mahni mawhphurhna hlen chhuak thei lo” tia SEC hi la puh talh bik tur em ni ang? tih chu zawhna awm thei a ni awm e.