Tun hnaia AMC Board of Councillors thukhawmin budget pharh paha kum 2023-24 chhunga hmalakna tur hrang hrang an tarlan zingah, ‘Aizawl mipuiin tui in tur thianghlim hnianghnar taka kan neih theihnan rain water harvesting programme kalpui a ni ang’ tih kha a tel a. Khawpui enkawltu sawrkar (AMC)-in ruahtui khawl a vei hi thil tha leh lawmawm tak a ni.
PHE hotute chuan Aizawl tuilakna Phase I&II puitu a pathumna peih fel tep a nih thu leh, hei hi peihfel a nih hunah chuan Aizawl mipuiin tui hnianghnar takin an dawng thei ang tih tunhnai khan an sawi a. Tui lak tur a awm phawt chuan a lakna tur hmanrua chu a awm dawn tihna a ni ber awm e.
Hetih lai hian, tun hnaiah Aizawl mipui tui tlan ber Tlawng lui chu a kam nasa hle a, ruah a sur loh chuan tui pump tur pawh a awm mumal lo mai dawn niin PHE hotute chuan an sawi nghe nghe a nih kha. Vanneihthlak takin a hun teah Chung lamin tui pump tur a rawn tipung leh hlauh a, a vanneihthlak hle.
Aizawlah hian mihring nuai li vel awm tling tawha ngaih a ni a, chu chu Mizoram mihring hmun thuma thena hmun khat dawn a ni. Hnianghnar taka mihring nuai li velin tui an hman tur chhawpchhuah chu thil namai a ni lo; tuilakna nei eng ang mah ila, a lak tur ber tui a awm miau loh chuan awmzia a awm lo. Kan lui tui kiam nachhan pawh tuihna a kang vang a ni; sawi tam ngai lovin kan hre vek tawh.
Vanneihthlak takin van lam tuihna erawh kum tin kan la hmu tha thawkhat. Ruahtui tlak tam dan tehnaah, Mizoram hian kum khatah ruahtui 2500mm vel a dawng a; chuti chung chuan tui tlachhamin kan buai viau zel reng mai.
India rama thlaler zau tak awmna Rajasthan state-a Jodhpur district chuan kum khatah ruahtui 370mm an dawng a, mahse tui in tur tlachhamin an awm ve lo; a chhan pawh van ruahtui an khawlkhawm miau a ni. Kan MP(RS) Pu K. Vena pawhin kum hnih kaltaah khan a hmunah a zu zirchiang a, Mizorama van ruahtui khawlkhawm dan tur a rawn vei haw hle a nih kha. Ram hruaitute hian a thu chuan rainwater harvesting pawimawhzia hi an sawi nasa thin khawp mai.
Hei tunah, khawpui enkawltu sawrkar AMC lamin ruahtui khawl an rawn vei ve leh ta a, vei phawt loh chuan engmah a hlawhtling thei bawk si lo. A taka tihhlawhtlin tumna hi ‘la vei leh chhawn’ a ngai ta a ni ber awm e. AMC hmalakna tur pawh hi a tha, ne ne ral lo hram rawh se. Tuihna a kàng a, lui tui a kâm a; van ruahtui erawh a la kang ve lo; chumi lo khawlkhawm tura hmalakna chu Chunglam pawhin ‘remhriat thlak’ min tihpuiin, mal pawh a sawm ngeiin a rinawm a ni.
AMC hmalakna tur ‘Ruahtui Khawlkhawm’ hi.
