AMC-in ran vulh khapna dan a pass tak kha ZPM corporator-te putluh – Rosiamngheta

AMC-in ran vulh khapna dan a pass
tak kha ZPM corporator-te putluh
– Rosiamngheta
Aizawl Municipal Corporation-in vawk leh ar vulh khapna dan a hman chu ZPM corporator-te motion putluh an pass a ni tih corporator kalchhuak ta Rosiamngheta chuan a sawi.
AMC inthlan tura INC candidate thenkhat leh INC corporator hlui Rosiamngheta hian thuthar thehdarhtute an kawm a. INC kaihhruai sawrkar a pian chuan MNF kaihhruai AMC sawrkarin Aizawl khawpui chhunga vawk leh ar vulh khap tlatna dan a lo siam chu zangkhai zawk leh awmze nei zawka hman a nih theihnan an ennawn dawn tih a sawi.
Aizawl khawpuiah hian a veng azirin ran vulh remchanna hmun tam tak a la awm tih Congress party chuan hria in, AMC area zawng zawnga ran vulh khap burna dan khauh tak chu mipui tana tangkai turin an siamtha dawn tih a sawi a ni.
“AMC-in ran vulh khap burna dan a pass tak kha ZPM corporator-te motion putluh a ni a. ZPM motion putluh avanga ran vulh duh ngawih ngawih chhungkaw tam takin harsatna tawk mek kan ni tih hi Aizawl mipuiin kan hriat a tul,” a ti.
Municipal hi mahni ro inrel a ni a. India danpuiin municipality dinhmun a tarlan danin, AMC chu state sawrkar telloin a kal thei tih corporator hlui hian a sawi. Municipal corporation chu sawrkar va thawhpui viau tu corporation emaw sawrkar doa ker ngar ngartu corporation pawh a ni lo, tiin, “State sawrkar tan thingtlang lamah mipui tam tak enkawl tur an awm tho avangin, khawpui chu subject thenkhatah hian lo inenkawl hrang ve rawh se, tiin mawhphurhna a pe a, a subject chanah chuan amahin ro a inrel mai tur a ni. MLA emaw minister emaw pawhin zuk sawi theih an nei lo,” a ti.
Entirna pe in, lirthei dahna atana AMC-in parking area a rina a pass tawhah chuan state sawrkar thuneitute emaw MLA leh minister emaw in AMC Parking Area kha car pakhat leng tur pawhin an tizimin an tizau ve thiang tawh lo tih a sawi. Hei vang hian thenkhat chuan ‘local self- government’ mai pawh ti loin ‘mini city government’ an ti hial tih a sawi a ni.
Municipal chu state sawrkarin an duh duh a an tihkual theih a ni loa, Aizawl khawpui nun awmze neia a subject chan hmanga enkawl mai tur a ni. Khawpui thianghlimna kawngah, a mawina kawngah, a faina kawngah amahin mawh a phur a, party thenkhatin state sawrkar lai agency pakhat deuhthaw ang maia an ngai hi a dik lo tih Rosiamngheta hian a sawi.
“Municipal hi mahnia thuneihna nei, mahnia ro inrel a ni. India ram Finance Commission atanga budget hran mumal taka nei thlap a nih avangin municipal-in amah leh amah a inenkawlna tur sum Finance Commision-in a pe thin. Chu a sum dawn tur chu state sawrkarin ni 10 ralhmaa AMC hnena a pekchhuah loh phei chuan state sawrkarin a pekchhuah tlai vanga hremna sum pung nen lam a pe hial zawk thin,” a ti.
Rorelna chu tlachawp leh dap chawp taka tih tur a ni loa, ngaihtuahna fim hmanga thutlukna dik siamna hmun tur a ni tih MPCC hruaitu hian a sawi a. Chuti anga rorel tur chuan Congress party chuan milar emaw ngawt an zawng loa, rorelna tha thlen tura rorelna hmuna tawnhriat nei tha an chhawp chhuak tih a sawi a ni. Chutianga rorelna tha thlen tur chuan khawtlang rorelna lama sulhnu nei tha leh inhmang mekte candidate atan an thehchhuah chu mipuiin vote turin an ngen tih a sawi bawk.