AMC kaihhruai veng pahnih ram
chin chingfel tur Committee din
Aizawl Municipal Corporation chuan Nilaini khan Dawrpui Veng leh Chhinga Veng khawtlang hruaitute kawmin ramri chungchanga buaina awm an sawiho a. Ramri chungchanga veng pahnih inkara buaina chingfel turin Committee din a ni. Veng pahnih atanga khawtlang hruaitu kalkhawmte hian Committee-in hma a lakna piahlamah hmalakna dang awm tawh lo se tih thu an pawm bawk.
Aizawl mayor H Lalremtluanga kaihhruai thutkhawmah hian AMC executive corporator leh official-te bakah veng pahnih aiawhin local council leh NGO hruaitute an tel a. Mayor chuan ramria buaina awm chu pawi a tih thu leh chinfel theih a nih a beisei thu sawiin, buaina awm mek a fel thuai theihnan rilru zau tak pu turin veng aiawhte a ngen. Remna leh muanna a awm theihnan local council leh khawtlang hruaitute chu hma la turin a ngen bawk.
Veng pahnih aiawh hian an ramri chungchanga buaina leh a kaihhnawih thil thleng dang sawihoa chingfel turin lungrual takin ‘Committee on Land Dispute between Chhinga Veng and Dawrpui Veng’ an din a. Chairman-ah Aizawl deputy mayor R Lalawmpuii, vice chairman-ah Ward No.9 corporator B Lalawmpuii, secretary-ah deputy Municipal commissioner K Vanlalruata a ni.
Member-ah AMC executive operator pali – Christina Roluahpuii Sailo, Vanlalhruaia, Vanlalfaka leh K Lalrodinga; Dawrpui leh Chhinga Veng-a Local Council chairman leh member pakhat ve ve bakah veng pahnih YMA, MUP, MHIP president leh secretary theuh, prominent citizen pakhat ve ve R Rosiama (Chhinga Veng) leh Vanlalbika (Dawrpui) ruat an ni.
Veng pahnih khawtlang hruaitute chuan, ‘Veng aiawh kalkhawmte hian Committee on the Land Dispute between Chhinga Veng and Dawrpui-in hma a lakna piahlamah hma lak rem an ti lo tih an sawi a. Hmalakna dang reng reng engmah a thlen lohnan hma kan la ang,’ tiin resolution an siam.
AMC kaihhruai veng pahnih ram chin chingfel tur Committee din
