By: Hlimpuia
Great Britain industrial revolution, Singapore, Japan etc ten hun harsa tak tawk a an din chhuah dan sawi tur a tam ang, hengte aia Mizoram nena inmil hmel zawk America Homestead Act hi sawi tum teh ang.
Miss Universe lo ralkhat ngaihzawn ve ngawt ai chuan kan hnampui ngaihzawn hian chhungkaw din a awlsam hmel zawk?
Ram leilung hausa leh mihring fing zawk te tihdan zir tum chu phak an harna riau a awm.
America Homestead Act hi May 20, 1862 khan pass ni in, kum 1904 khan kan mamawh tawh lo e tiin an hmang zui ta lo thung, he Act-ah hian Sawrkarin mimal tu pawh ram an hman phalsakin a ram that dan azirin a zauh zawng a inang lo thluah thung, Colorado leh Texas-ah te Alaska angah te chuan ram a inthat hleih em vangin ram hman an phal hi a inzauh hleih viau mai, hmun thenkhatah te phei chuan Acres 160 te thleng pawn a awm, heng an ram hman hi an enkawl peih chhung atan ni in, an enkawl peih lo/ thei lo a nih chuan sawrkar ram a ni leh mai.
He Act hian Cowboy kan tih hote pawh kha a hrin chhuah a tih theih awm e, Cowboy Film en thin chuan Ranch/ Farm inhlat tak takin an nei tih kan mitthla thiam awm e.
Farmers ten thlai leh rante an han thar chhuak tak tak a, vensaktu mi huaisen leh rorum deuhte an lo mamawh in, thatchhe deuha pawisa lakluh dan lo zawng misualte pawh an lo awm ve zel a, thawnthu leh a tak behchhana film siam te a rawn chhuah tuk tuk kha.
Sawi uar deuh phei chuan he Act hman tan chhoh tirha an thlai leh ran thar chhuah ho kha a tam lutuk a, Tuifinriatah te an paih hum hum ni tein an sawi (an thil thar chhuah ho kha sawrkarin a lei sak)
Khatiang a paih ral mai mai kha dahthat dan thiam industry, company te lo awm in, an eizawnna a lo len belh zel a, sakawr tawlailir leh sakawr chauh a phurh theih loh chin a rawn awm a, Motor, Rel ( Train) siamtu leh siam thiam an luh belh ve zel a ngai a, chutiangin Bank thleng paw’n, thenkhat nunphung vang khan, mahni ina pawisa kawl teuh teuh kha him tawk hek lo.
An Economic Circle kha inher rem chho tak a ni, an Gross State Domestic Product (GSDP) Growth Rate sang awk awk lo chi a ni lo.
America Homestead Act hi Mizoram mila her rem hret a, hman dan a awm a rinawm maw le.
’Tiang deuha ram hman hawh hi Thenzawl VC ten an ram huam chhungah Dragon Fruit chingtuteah an kalpui tlatin ka hria, an tihfuh chhoh phian pawh a rinawm in, khawdang hruaitute pawn an ram huam chhungah eng thil nge tha duh tih ngaihtuah chunga an tih ve phawt chuan an huam chhung mai ni lo, Mizoram tan hian a that ngei a beisei awm.
Mizoramah hian Agriculture, Horticulture, Vety etc angte tun aia inchawm tawn tha zawka kalpui theih deuh deuh a chakawm, mihring tan a tha chu kan ran vulhte tan a tha ve zel bawk si, ran chaw man a tlawma lei awlsam zawka a awm phawt chuan kan Sa man a hniam ang a, ni tina inhlawhfa chawp tan paw’n ei tha zawk ei in, an hlawh atangin sum dah that an ngah thei zawk ang, Sa man a tlawmna hmunah chuan thlai man a tlawm zel.
Chung thleng tur chuan, tun aia kan lui dungho hi kan hman tangkai thiam a tul, kawng, tui, electric current tha a awm chuan mihring chu chung hmunah chuan automatic-in an awm mai.
Khawvel Civilisation hi han thlirin han chhiar ila, luidung phaiah a tam zawk chu a in tan, Indus Valley Civilisation (Harappa, Mohenjodaro) Tigris leh Euphrates (Mesopotamia) Ancient China te pawh Yangtze (Yellow River) sawi tur a awm nual mai.
Hengte hian (Health) mihring hriselna a khawih tel nghal, tu pawh a economy a that phawt chuan hriselna lam a ngaihven awlsam bik in, ’tiang lama thiamna nei tan hna a tam a ni zel mai.
Fashion, incheina lam a nghawng dan chu sawi tel lo mai ang, chhiartu tan a ninawm palh takin, bakah thil ngaihtuah awl a ni bawk a.
Zu chung chang sawi kai tel zauh bawk ang, ka sawi hi a dik leh tha ber tihna ni lo in, ngaihtuah ti zau ah.
Khawvel mi nawlpuiin Zu thaa kan hriat Vodka, Champagne, Tequila te hi sawi ila,
Russia Zu tha Vodka hi an siamna pui ber chu Alu ni in, thil dang atanga siam pawh a awm tho hmel na a, heng hi an tual chhung thar chhuah ni in, Vodka a nih hma pawn kutthnathawhna nen a inzawm a.
French Zu tha Champagne ni se, Grapes atanga siam ni in, a kaihhnawih kan chhut thiam nghal mai awm e.
Mexico Zu tha Tequila siamna Blue Weber Agave hi chik vak lo tan chuan Aloe vera Bawng tiat em maw tih mai tur, a lian zual phei chu Camel tiat te paw’n a hmuh theih ang?
Hei pawh an ram chhung atanga thar chhuah tho.
Heng industry raw material-te hi kuthnathawkte nen a inkaihhnawih ni in, an Economy Circle hi a bial dan a bial fuh riau.
Mizorama Zu zawrh tha kan tih dan hi ngaihtuah chian a ngai, tuna a lan dan chuan State dang ami lakluh tawpa zawrh a nih hmel a, kan GSDP chu a kang awk awk ang a, a mihring zawk kan awmna a hniam tual tual thung ang tih a hlauhawmna lai a awm.
Mizoramin raw material kan neih ve tho Buh hi siam chhuak ve ta zawk ila, kan ram awl tam tak hi Buh hmunah kan chan ang a, Zu siam lo tu pawh a hlawkna teltu a nih theihna hun tha chu a awm.
Tah tak hian ngaihtuah thuak ni lo, beng sik tak meuha ngaihtuah chian ngai a awm ta, Zu in duh mi zawt ta ila, Zu in hi i tlin in, i phu em ti ila phuin ka tlin an ti ang a, a uar zual phei chuan i buhfai no khat pawh ka ei lo, ka phuin ka tlin lutuk an ti maithei.
Nih, in chhungkuain in tlin em ti ila, chhanna leh ngaihtuahna a danglam deuh maithei, kan thenawm kual, in sawm vel han mitthla kual leh ila, chhungkaw eng zatin nge Zu hi tlin (afford) ang.
Heng hian Mizoram mipui dinhmum tlem tlem chu a hril thei maithei.
’Tah pawh hian ngaihtuah belh tur a la awm, Tequila Zu tha siamtu Mexico hi Economy tha ram tia sawi tur chu an ni lo, an ram mipui dinhmun ngaihtuah hian awhawm tak chu an ni lo.
Champagne leh Vodka siamtu French leh Russia hi chu an danglam leh zak thung a.
Mizoram mipui nawlpui nunphung hian Zu hi kan Control thei ve ang nge Zuin kan nunphung min Control vak zawk ang?
Engpawh ni se, Mizoram hi siam that theih a ni in, siam thatna lai tur tam tak a la awm thung tih kan pawm tlan vek ka ring.