America president 47-na Donald Trump
‘Pathianin he hun a thlen theih nan ka nunna a chhanhim a ni’ – Trump
November ni 5 khan United States of America chuan an ram hruaitu lu ber president thlanna neiin, vote tlate hi chhiar nghal a ni a. President hlui leh Republican presidential candidate Donald Trump chuan hneh taka hnehna changin, America president 47-na atan tlinga puan a ni.
Thlan tlin a nih thu puan a nih hnu hian Trump chuan America mipuite hnenah lawmthu sawina nei nghalin, America ram leh hnam din nghet zel nan leh politics siamtha tura ke pen a nih tur thu a sawi.
Trump chuan an ram mipuite chuan political movement an ngaihven tak zet tawh nia sawiin, tun tum inthlan phei chu political movement lian ber nia a hriat thu a sawi bawk.
Lawmthu a sawinaah Pathian hming a sawi ri ring hle a, Amah avanga a nunna chu la chhan him nia sawiin, America chu Pathian hriat ni tura kawng dik zawh tura a kaihhruai leh dawn thu a sawi.
Tin, president thar chuan a campaign laia nasa taka lo puitu Elon Musk chungah lawmthu sawi nasa hle in, America in Elon te ang a nei chu a lawmawm hle tiin, khawvel en rawn ni tura mi a ngaihna hria tak tak an ramin an neihte chu hman tangkai zel a tum thu a sawi bawk.
Donald Trump chuan inthlannaah lo chak zo ta lo pawh nise, a felfai phawt chuan ka pawm ang, a ti a. Tun thleng hi chuan dik lo taka tih a awmin ka hre lo, ka lawm hle a ni, a ti zui bawk.
He thu buatsaih lai thleng hian tling zo ta lo presidential candidate leh vice president ni lai Kalama Harris chuan inthlan chungchangah engmah sawi a la nei lo thung a, Democratics lam thawm a reh rih hle a ni.
America president 47-na Donald Trump ‘Pathianin he hun a thlen theih nan ka nunna a chhanhim a ni’ – Trump
