American Idol judge tur Carrie Underwood

American Idol judge tur Carrie Underwood
American Idol winner lo ni tawh Carrie Underwood chu American Idol judge atanga chawl ta Katy Perry thlaktu a ni dawn a, season thar hi March ni 9 atangin an tan ang. Katy Perry chuan amah thlaktu tur a hmuh dan sawiin, “He show atanga lar chhuak a ni a, a khalh thiam ngei ang tih ka hria,” a ti.
Katy Perry chuan American Idol judge-a a lo thutpui tawh Luke Bryan leh Lionel Richie te nen chuan contestant te thil tawn leh contestant nih dinhmun an la tem ve loh avangin a nihna tak an hre lo a, Carrie Underwood erawhin chutiang chu a lo tawn tawh avangin, “Ani chuan engkim a hrethiam dawn. Artist kan nih angin an dinhmun eng emaw chen chu kan hriatpui a, mase, ani (Underwood) chuan a lo nunpui tawh kha a ni. Chuvangin a thurawn ngaithla duhte chuan an hlawkpui khawp ang,” a ti bawk.
January ni 20-a US President Donald Trump lak luhnaa ‘America the Beautiful’ thiam taka satu Carrie Underwood chuan, “Country music-ah hian zung ka kaih nghet viau a, chuti chungin genre hrang leh music dangah pawh ka mikhual chuang lo. Insiam rem thei tak ka ni a, audition-ah pawh ka lo ngaihthlakin ka en thlirna tlang ka lo siam rem zel theiin ka ring,” a ti.
Underwood chuan contestant-te an insiamthat theihna turin dik leh tlang tak, mahse, dawnsawn nuam si a thurawn pek a tum thu sawiin, “Pehhel lovin insiamthatna tur dawnsawn nuam tak siin a inkawhhmuh theihin ka hria. Hetah hian an beisei leh duhthusam ram tihlawtling turin an rawn thawk chhuak ve tih kan hriat thiam a ngai,” a ti bawk.