Nimin, Nilaini, March ni 20, 2024 chhun dar 12:30 khan 27th AMKA State Karate Championship 2023-2024 chu hawn a ni ta.
Hawnna programme-a khuallian Central YMA president Lalhmachhuana chuan, “Naupang tet te atanga nun kawng dik kaihruaitu AMKA hruaitute an fakawm hle. Hetiang tet te atanga inthununna tha hmanga kaihhruai an ni hian ka rilru a khawih takzet a ni.
“Karate infiamna hi inthununna a tha a, ruihhloah kan thalaite an buai a, hemi atan karate hi invenna tha tak a ni. Ram pumah, veng tinah karate hi zir vek thei ila duhthusam a ni.
“Karate inthununna hian aia upa zahna, thuawihna, nu leh pate thuawihna a keng tel hi a ropui tak zet a ni.
“Pawl bing ngaihtuah lovin inlungrualna nen kan ram hi a kal a ngai a, bik bik awm lovin inlungrual ila, i thawkho ang u. A remchan dan ang zelin AMKA leh CYMA chu kan thawkho zel ang,” a ti.
AMKA president Shihan C. Dosavunga pawhin thu sawiin, “A tul phawt chuan karate thiamte ram leh hnam chhanhim turin kan inpeih reng a; ramriah thiam thil hmanga kan nula tlangvalte’n karate an zir thiam a ngai takzet a ngai a ni,” tiin tun dinhmunah Mizoram khawpui ber Aizawlah pawh karate zirna hmun nghet tun thlenga an la neihloh thu a sawilang tel bawk.
Karate inkhawmpui hawnna programme hi AMKA executive member Rev. Dr. Lalchawimawia’n a kaihruai a; vawiin chawhnu dar 3:30-ah a tiak ang.
AMKA State Karate Championship
