AMVCA hruaituten Aizawlah
VC Chawlhbuk sak an ngen
All Mizoram Village Council Association (AMVCA) hruaitute chuan an member-te tan Aizawlah Village Council Chawlhbuk sak an ngen.
AMVCA hruaitute hian Thawhlehni khan Rural Development & Administration minister Prof. Lalnilawma an kawm a. An thu thlen zingah – Aizawla VC Chawlhbuk sak, Mizoram House hrang hranga VC member-te tana hamthatna siamsak leh VC tharten 15th Finance Commission hnuaia an huamchhunga hna an thawh ve theihna tura ngenna a tel.
VC mawhphurhna dah pawimawh lehzual a nih theihnan VC dan ennawn leh siamthat a ni chu lawmawm an tih thu AMVCA hruaitute hian an sawi bawk
Minister chuan VC hruaitute chu khawtlang tihhmasawnna tura mipui aiawha thlan an nih angin hmasawnna hna kalpui kawngah hmanraw pawimawh an nih bakah endiktu leh viltu an ni tih a sawi a. Khaw hmasawnna rotling siam a nih theihnan ni 100 inhlawhna – MGNREGS tha taka hlenchhuah kawnga thawktu pawimawh an ni tih a sawi.
AMVCA hruaitute ngenna chu khawtlang inkaihhruaina kawnga VC member-te thuam chak lehzualna tura thil pawimawh a ni, tiin, RD&A department piahlamah department dangte nen inrawnkhawm ngai a nih avangin a bawhzui sak tur thu a sawi a ni.
AMVCA hruaituten Aizawlah VC Chawlhbuk sak an ngen
