An captain goal-in Denmark chakpui zo lo
Euro 2021 bul an tanna inkhela Finland an hmachhawn tumin khelmualah nikhaw hre loin Christian Eriksen a tlu a, a damchhuak dawn em tia khawvelin an thlir hnuah a lunga khawl (Implantable Cardioverter Defibrillator) vuah chungin a rawn thachhuak leh a, football khelh a chawlhsan hlen ngei rinna piang zui leh mah se Manchester United thuam a inbel zui leh mai ni loin Euro 2024 kal mekah captain niin Denmark a rawn ho leh thei a; Pathianni zanah Slovenia laka an hmahruaina goal khung bawk mah se rin kai lo zawk Slovenia hian an siphurh putin team inlenhleih fu pahnih hi 1-1-in an inhnehtawk.
Stuttgart Arena-a European Championship Group C inkhelah hian minute 17-na lekah Eriksen hian Jonas Wind siamsak atangin Denmark hmahruaina goal a tilut a, Dane-ho hian first half thunun zuiin, goal khung belna hun remchang pawh vawi duai lo an hmu a, an hlawhtling zo lo thung.
Qualifying khelh laia Denmark lo hmachhawn tawh Slovenia kha Europe ram lian ni pha lo mah se Stuttgart khawpuiah khan fans an nei hraw a, an supporter-te thawm a ring a, khelmuala an player-te an auphur reng peih a, hun tawp hma minute 13 chauh awm tawhah Erik Janza chuan pui taka chhuihin Denmark player fuhkawi chuan goalkeeper Kasper Schmeichel a tibuai a, Slovenia lamin an siphurh sutin, 1-1 a nih hnuah Slovenia phur zual sauh mah se khawi lam ve ve mahin goal dang an khungbelh zo lo a, chak zawk awm loin team pahnih an inthathen.
Group C inkhel dangah England-in an tumpui Serbia an hneh avangin kum 2021 semi-finalist Denmark tan an hmabak match dangah chak loh a rem lo na sawt ang!
Slovenia hian Denmark an hmachhawn hnuhnung vawisarihah hnehna an chang zo lo fai vek a, mahse, tournament liana an draw phak avangin Ningania Serbia an tum leh turah phurna sang zawk an neih phah ngeiin a rinawm a; Denmark-in an tana match pawimawh lutukah England an hmachhawn thung ang.
An captain goal-in Denmark chakpui zo lo
