An inkar thatzia lan nan Russia – North Korea inkar lei hawng

Lirthei hmanga Russia leh North Korea inkalpawhna tur lei hmasa ber hawn a ni ta a, ram pahnihte inkungkaihna nghehzia lannaa ngaih a ni.
Thawhtanni khan Tumen River chunga kilometre khata thui, thlur hniha lirthei tlan theihna lei hi truck-ten an zawh tan a ni.
Ram pahnihte hi a hma chuan thlawhna leh rel chauhvin an inkalpawh thei a, kawng thar a awm ta hian an inkungkaihnaah mel lung thar phunin Russia-in Ukraine a rûn atangin a nghet lehzual zel a ni.
Russian Prime Minister Mikhail Mishustin-a leh North Korean Premier Pak Thae-song te chuan video link hmangin an ram ve ve atangin thawktute leh sorkar hotute hnenah thu an sawi a ni.
Russian thuneitu chuan ni tin lirthei 300-in an kân theih tur thu a sawi a. “Nakin zela sumdawnna, eibar, scientific, technological leh nun dan phunga inzawmna tihngheh zelna tur a ni dawn a ni,” tiin Mishustin-a chuan a sawi.
Truck-ten bungraw phurh nan an hmang tan nghal tih Russian sorkar chuan a sawi a. Kum tawpah chuan a nih dan tur ang tak ni tawhin mihring inkalpawh nan pawh hman theih tura tih a ni.
Kum tam tak lei dawh hi sawi a nih hnuah kum 2024-a Russian President Vladimir Putin-a’n North Korea a tlawh hnu, nikum April atang khan hna tan a ni.
Lei thar hi Red Army sipai, kum 1946-a North Korean hruaitu hmasa ber, Kim Il Sung-a thah tuma grenade-a vawm a nih tuma a nunna a chhansak avanga fak hlawh, Yakov Novichenko-a hming chawitir a ni.
Lei thar hawn hi Russia-in February, 2022 atanga Ukraine a rûn hnua Moscow leh Pyongyang inkar that sawt zelzia tihlanna nia ngaih a ni.
Indona avang hian khawthlang ramten Moscow hi an kawmserh a. Pyongyang erawh chuan kum 2024-a Ukrainian sipaite kal zel tur dang turin Kursk region-ah Russia pui turin sipai tam tak a tir thung a ni.
Russian Prime Minister Mishustin-a chuan lei hi engineering project mai ni lovin ‘inthian thatna lantirna’ tiin a sawi a, hawn a ni ta chu ‘chanchin pawimawh bik’ tiin a sawi bawk.
Pak Thae-song-a pawhin lei hian ram pahnihte thawhhona titha lehzualin ‘ram pahniha miten hmasawnna leh than duanna an duh ang puitlinna’ tiin a sawi niin Russia-a TASS news agency chuan a tar lang.