An kawtkaia Barca chak tur dangtu Atleti
Thawhlehni zan Copa del Rey semi-final first leg match-ah chak mai tawh tura ngaih Barcelona chuan hun tawp dawnah goal hnih chhuahin an mikhual Atletico Madrid lakah 4-4 draw an hlawhchhuak ta zawk a, Madrid khaw lama second leg khel tur an nih avangin an tan hmabak a ko zawka ngaih a ni!
Nou Camp thuamThat chhunga an home ground Estadi Olímpic Lluis Companys chhunga mipui 40,915 pungkhawm hmaah mualneitu team inrin hmain Manchester City attacker hlui Julian Alvarez khan home fans barakhaihin Tan aTanga second 50-na lekah Atletico hmahruaina goal a thun!
Catalan mipui tihrilhhai zual turin minute ruk an khel tling hlawt tihah Antoine Griezmann chuan a club hlui Barcelona goal-ah sihnih faia Madrid club hmahruaina goal a tilut ve leh a, tun season tir lam La Liga match-a Barcelona laka hnehna chang tawh Atletico Madrid-in hnehna an chang nawn leh dawn nia ngaihna a piang hman lo thei lo!
Barca beilet tan minute 19-ah Pedri chuan an siphruh pakhat zawk a sut Then a; minute hnih a liam leh tihin Pau Cubarsi chuan mualneiu team siphurh sut zawhna goal a tauhlut zui ve leh ta a ni.
Heti chinah hian chhaihkawlh tawk Barcelona an la lungawi awzawng lo a! Chawlhlawk hma minute li la awmah Inigo Martinez chuan mualneitu team hmahruailetna goal tauhlut ve lehin, half time-ah Nou Camp club zawk hian 3-2-in hma an hruai.
Second half laihawlah Robert Lewandowski chuan Hansi Flick-a team chak nemnghehna goal ni tur awm taka ngaih thawh ve leh bawk mah se Atletico Madrid tlawm hreh erlet hian hun tawp lamah an siphurh pahnih an sut ve leh tlat!
Hun pangngai tawp hma minute ruk chiah awm tawhah Marcos Llorente chuan mikhual team beiseina tinung turin an siphurh pakhat a sut Then a; hun pekbelh minute thumna a kal mek laiin substitute Alexander Sorloth chuan Diego Simeone-a team tlawm tur chhanna goal thawhin, goal riat tehreng luhna inkhelah chak zawk awm loin team pahnih an inThaThen a, April thla second leg-a inchingfel turin an Tin phawt.
Sorloth hian season tir lam khan top flight-a Barca an hnehna goal pawh hun pekbelhah a lo thun tawh a, tunTumah Atletico tlawm tur chhantu lian ni lehin, cup season kal mekah goal li a thun tling tawh.
An kawtkaia Barca chak tur dangtu Atleti
