An kawtkaia chak nuamsa Real
Inrinni zan La Liga inkhel pakhatah Real Madrid chuan sihnih faia an mikhual Celta Vigo hnehin, goal khat thuna goal khat siamchhuaktu Marco Asensio a langsar.
Asensio hian chawlhlawk hnaih tawh minute 42-ah Vinicius Junior chhawpsak atangin Real hmahruaina goal a thun a; second half tir lam minute 48-ah Asensio siamsak atangin Eder Militao chuan chiang zawka Carlo Ancelotti team chakna goal a tauhlut ve bawk.
Ti hian, Real Madrid tan kumin chhung bikah Marco Asensio hian inelna hrang hrangah belhkhawmin goal riat a tilut tling ta a, Europe league lian zual pangaah Spanish player zinga goal khung hnem ber a ni mek.
An kawtkaia point thum an hlawhchhuah leh nen La Liga table-a pahnihna luahtu Real hian point riatin hmahruaitu Barcelona an la pha lo a, nizan result tarlan hman lohah Catalan team hian an mikhual Atletico Madrid an hneh chuan table-a a sang pahnih inthlauhna hi point 11-ah bawk a kirleh ang.
Inrinni zan inkhelah Iago Aspas chu Celta tana goal thunna hun nei tha ber niin, a chance neih hi Belgian goal-keeper Thibaut Courtois chuan theihtawpa fanin a dansak.
Los Blancos lam hian goal hnih an neih bakah half-chance han tih tur ang chi an nei nual a, chu’ng zinga pakhat Aurelien Tchouameni tauh chu goal sirah chhuakin, Karim Benzema pawhin pen 25 vela hla atangin goal chungah a hlawichhuak ve bawk.
Minute 42-a Asensio goal kha he match-a Real Madrid-in ‘target’ an fuh vawikhatna niin, Militao goal-in game result a nemnghet zuia ngaih a ni.
An kawtkaia chak nuamsa Real
