Lewis Hamilton chuan Pathianni khan British Grand Prix-ah chak ni hmel a rawn hmu ve leh ta hlawl a, December 2021 hnu lama Silverstone tlankawnga a chak leh vawikhatna niin, a career-ah vawiku zet a home grand prix hnehna a chang tling ta bawk.
Tlankawng huh leh ro inchhawkna British Grand Prix-ah khan hun rei tak kil thum atanga innawrna hmuh tur awmin, Hamilton hi Max Verstappen leh Lando Norris-te nen an inthlur ngar ngar a, a tawpah Briton hian hnehna changin, pahnihna Verstappen leh Norris-te hian lawmman semna dawhsan hniam zawk pahnih an luah ve bawk.
Intlansiak tawp lamah Verstappen-a Red Bull car chuan rawn nawr bawk mah se Hamilton hian a career-a a vawi 104 chakna a hum thei a, a home race-a vawikua a chak tlin kha record ni nghalin, circuit pakhata hnehna chang ngunber a ni.
Kum thara Ferrari lama insawn tawh tur Hamilton tan tun kha Mercedes car khalh chunga British GP a hmachhawn tawpna tur ni tawhin, hnehna a chan rual khan chu mi chungchang nena inkaihhnawih tawngkam chhakchhuakin, “He hnehna hi ka tan thil naran a ni lo,” a ti.
Mercedes team principal Toto Wolff pawhin Silverstone hnehna kha an team leh Hamilton-a tan lasi thawnthu ang mai a nih thu a sawi ve bawk.
Mipui 164,000 zet pungkhawmte khan British driver-te an auphur nasa hle a, a bikin Hamilton an lawm zual a; a tir lama British team Mercedes driver pahnih George Russell leh Lewis Hamilton-te hmahruai lai phei chuan thawm a na zual.
Hamilton-a team-mate Russell chuan podium lawnkai zo ve ta lo mah se pathumnaah British driver dang Norris kan hmu a, Btitish fans tan race duhthusam a tih theih hial awm e.
An kawtkaiah Hamilton chak hlawl!
