Inrinni zana English Premier League khelhah champion tura rinkai zinga mi Arsenal chuan an mikhual Fulham an hneh zo lo va, tam zawk ni chungin point thum an hmu zo lo. Arsenal an chak zawh loh lai hian an elpui lian Tottenham an khel tha chhunzawm a, Mimualah AFC Bournemouth an hneh a, pahnihnaah an inhlangkai.
Emirates Stadium-a lenglut Fulham in bul an tan tha viau a, inkhel tan atanga minute khatna lekah Andreas Pereira chuan si nghak Aaron Ramsdale awm hmun dik lo hremin hmahruaina goal a thun nghal. Arsenal hian kum 2023 chhungin inkhel tan atanga minute khat chhung lekin goal vawi thum ngawt an chhuah a. Hei hi EPL record a ni nghe nghe. Team lian lakah hma taka goal an thun vangin inrintawkna sang zawk an nei a, hmuhnawm zawkin an inlan theih phah. Hma taka goal an chhuah sut tumin Arsenal in an mikhualte an nawr a, inkhel hmuhnawm tak an lantir a, hma taka goal an chhuah hi inkhel tihmuhnawm lehzualtu a ni.
An mualah Arsenal khel chhe lo viau mah se an si phurh sut turin goal erawh an thun thei mai lo. An hun tha neih an chhawr tangkai zawh loh fo hnuin minute 70-naah penalty an hmu ta hlauh. Fabio Vieira penalty hlawhchhuah hi Bukayo Saka chuan a pet goal a, an si phurh a sut.
An si phurh an sut vangin Arsenal an phur thar a, an khel tha zui leh. Na takin an mikhualte an nawr a, goal pawh an thun zui leh thuai. Minute 72-na lekah Fábio Vieira siamsak atangin Eddie Nketiah chuan hma an hruai letna goal a thun. Inhnaihchilh taka goal an thun zawn vangin Arsenal hian hnehna an chang let ngei tura ngaih a ni hman. Hnufual zawk an nih hnuin minute 83-naah Calvin Bassey hnawhchhuah a ni a, Fulham dinhmun a chhe leh zual sauh. Team lian lakah si an phurh bakah tlem zawk an nih vangin tlawm ngei tura ngaih ni mah se Fulham in thil mak an thlentir a, hun tawp dawn hnaihah goal an thun. Minute 87-naah vei lam sirah vengtu nei lova awm João Palhinha chuan goal a thun a, an si phurh a sut. Palhinha goal thun hnu hian hun goal dang a luh belh tawh lova, Arsenal leh Fulham chu 2-2 in an inhnehtawk zui ta a ni.
Tottenham an chak
Inrinni zana inkhel dangah London hmar veng club lian Tottenham an khel tha chhunzawm a. Inrinni hmasaah si hnih faia Manchester United hnehtu Spurs hian Vitality Stadium-a an khingpui AFC Bournemouth chu si hnih faiin an hneh.
Vitality Stadium a lenglut Tottenham hian an khel tha viau a, goal pawh an thun thuai. Minute 17-na lekah James Maddison chuan Pape Sarr siamsak atangin hmahruaina goal a thun. Spurs in Leicester City atanga an lak luh Maddison hi a club thar tan a khel tha chho viau a, season tharah khelh thum chhung tlawm nei lova an kaltluang nana player pawimawh leh thawhhlawk tak a ni. Maddison goal thun hnu hian goal a han vang vang a, chawlhlawk hnu lamah goal hmuh tur a awm leh chauh. Minute 63-naah Dejan Kulusevski chuan an goal hnihna a thun a, an chakna a nemnghet. Hun tawp thlengin goal dang a luh belh thei tawh lova, Spurs chuan 2-0 in hnehna an chang a, point thum an hmu.
Tottenham hi season tharah manager thar Ange Postecoglou hnuaiah Tottenham an khel tha rih viau a, EPL ah vawi thum khel tawhin tlawm an la nei lova, vawi hnih chak tawhin point sarih an hmu a, pahnihna an ni mek. An goal thun khawl Harry Kane awm tawh lo mah se buaina lian an la tawk rih lo thung.
An mualah Arsenal an chak zo lo
