La Liga champion Barcelona chuan Pathianni zana an mikhual Real Betis chu Raphinha goal hnih thun hmangin an hneh a, Barca hi La Liga 2025-26 season a home match ah an chak vek a. La Liga a khelh 38 a zawm hnuah an muala chak vek thei awmchhun an ni.
Champion lai Barcelona hian May ni 10, Pathianni zan khan El Clasico-ah Real Madrid hnehin La Liga-ah an champion nawn leh. An champion hnuin Mimualah an tlawm phawt a, an muala an inlan leh hmasak berah an chak ngei tumin tan an khawh. Barca hian Raphinha goal hnih leh João Cancelo goal khat thun an chakpui.
La Liga hi 1997–98 atang khan team 18 atangin team 20-ah tihlen a ni a. 1997-98 season atangin season khatah team tinin vawi 38 theuh an khel tan. Match 38 a awm hnuin an mualah vawi 19 chak a, an muala chak vek an la awm ngai lova, Barcelona hi La Liga season khatah an mualah vawi 19 chak vek thei hmasa ber an ni. Game 38 a awm hma chuan an mualah chak vek erawh an lo awm tawh thung.
Nou Camp an cheithat vangin Barcelona hian season kal mekah home atan khelmual pathum; Estadi Johan Cruyff, Barcelona Olympic Stadium leh Nou Camp te an hmang a. Heng khelmual pathumah te hian an chak vek a. Khelmual pathum hmang chunga an chak vek hi a tihlu leh zualtu a ni.
Lewandowski an thlah
Nou Camp-ah Real Betis an hmachhawn hi Barcelona forward Robert Lewandoski tan home game hnuhung ber a ni. A muala a inlan hnuhnung berah Lewandowski hi mipuiin zah takin an chawimawi a, mawi takin an thlah liam.
Goal thun thei Lewandowski hian kum 2022 khan Bayern Munich chhuahsanin Barcelona hi a zawm. Catalan club lian tan inelna hrang hrangah vawi 191 a khel a, goal 119 zet a thun a, Barca hi trophy pasarih a lakpui.
An mualah Barca an chak vek
