Italian champion Napoli chu Inrinni zan Serie A match pakhatah Lazio chuan 2-1-in an hneh a, season kal laia an tlawm vawikhatna niin, an league game hmasa pathuma point ruk nen table-ah palina an luah a, he thu buatsaih lai thleng hian hmahruaitu AC Milan lakah point thumin an hniam.
Naples khaw inkhelah Lazio tan Romero Alconchel chuan darkar chanve an khelh tlin rualin goal hmahruai a thun a, mahse, minute hnih a liam leh tihah Piotr Zielinksi chuan mualneitu team siphurh sutin, second half tir lamah Japan midfielder Daichi Kamada chuan Lazio chakna goal a thawh ve leh a, an kawtkaiah Serie A champion lai an tlawm.
Mikhual goal hnih hi Felipe Anderson siamsak ve ve a ni.
Napoli manager Rudi Garcia chuan kumin June thla khan Luciano Spalletti thlakin de-fending champion a zawm a, a league game hmasa pahnihah a team thar chakpui mah se a vawithumnaah tlawm a pumpelh zo ta lo a ni.
Minute 52-a Lazio chakna goal khungtu Kamada kha kumin nipui insuan hun laia an sengluh niin, tun kha Serie A goal a thun vawikhatna a ni a, a goal thun hmang khan season kal laia a tumkhatna’n league-ah Lazio an chak a, khelh thuma point thum hum chungin table-ah 12-na an luah.
An mualah champion lai Napoli tlawm!
