Inrinni zana English Premier League khelhah thlasik bazar laia sum seng hnem fal Chelsea chu table mawngphaha awm Southampton hneh lovin an tlawm. Chelsea laka Saints chakna goal thuntu James Ward-Prowse chuan EPL a free kick pet goal tam lamah David Beckham record a hnaih zual zel.
Stamford Bridge a lenglut Southampton tan hian minute 45+1-ah James Ward-Prowse chuan mawi taka free kick chhuih goal in hmahruaina goal a thun. Chelsea hian an si phurh sut tumin tan khawh chiam thin mah se hun tawp thlengin goal an thun thei lo. Uiawm taka hun tha an hloh thin an tuar a. Table mawngphah awm lakah si khat faiin an tlawm ringawt.
Saints lakah an tlawm vangin Chelsea hi 10-naah an awm mek. Team lian Chelsea lakah point thum hlu tak an hmuh hmangin Saints hian him theih beiseina an nei thar. Saints hian khel 23 atanga point 18 hmuin table mawngphah an luah mek a. 16-naa awm mek Everton nen an inkarah point thum chiah a tla zep.
Chelsea laka Southampton chakna goal thuntu James Ward-Prowse khan EPL-ah free kick atangin goal vawi 17 zet a thun tawh a. EPL-ah free kick atanga goal thun tam ber David Beckham record tluk turin goal khat chiah a mamawh tawh a, player ropui Beckham record a tluk teuh tawh hle.
Inrinni zana inkhel dangah Everton chuan si khat faiin Leeds United an hneh a. Toffees hian manager thar Sean Dyche hnuaiah hma an sawn zel a, 16-naah awm mekin tlakhniam an pumpelh rih a. Sang zawka inhlan tumin hma lam an pan ang.
An mualah Chelsea an tlawm
![](https://theaizawlpost.org/wp-content/uploads/tap_logo-min-large.jpg)