An mualah Manchester United an tlawm

Inrinni zana English Premier League khelhah Manchester United chu an mikhual Nottingham Forrest hneh lovin an tlawm. United an tlawm rualin Manchester khaw club lian Manchester City pawh an chak zo lo bawk.
United an tlawm zawn
Season kal meka khel tha tluang hleithei lo Manchester Uninted hian season tharah beisei phak baka khel tha Nottingham Forrest chu Old Trafford-ah an mikhual. An mikhual Nottingham lakah an tlawm a, Reds Devils hian kar laihawla an khingpui Arsenal an hneh lova, Nottingham Forrest lakah an tlawm zui leh bawk nen EPL an khelh hnuhnung pahnihah an tlawm zawn ta a ni.
Old Trafford-a lenglut Nottingham Forrest in bul an tan tha viau a, goal an thun hma hle. Inkhel tan atanga minute hnihna lekah Nikola Milenkovic chuan corner atanga ball kal a tauh lut a, hmahruaina goal a thun nghal. Hma takah goal an thun vangin an phur a, inrintawkna sang zawk an neih phah bawk. Hma takah goal chhuah mah se United an buai rei lova, na taka an khingpuite nawrin goal pawh an thun har lo. Fuh taka an nawr tlang hnuin Rasmus Højlund chuan ball per let leh chu awlsam takin a pet goal a, minute 18-naah an si phurh a sut. Chawlhlawk hmain United hian goal an thun belh teuh hle a, Bruno Fefernandes free kick chhuih tha tak chuan goal bar a per a, Nottingham Forrest an him hram.
Chawlhlawk hnu lamah Nottingham Forrest an khel tha chhunzawm a, goal hnih an thun zawn. Morgan Gibbs-White chuan second half tan atanga minute 47-naah vanneihthlak ang reng takin hma an hruai letna goal a thun. Gibbs-White pet hi tha lutuk ni lo mah se United si nghak Andre Onana a chesual a, ho takin a chhuah. Onana chesual hian mikhual team a fuih phur viau a, goal pawh an thun belh leh thuai. Minute 54-naah Chris Wood chuan vanneihthlak takin a tauh lut. He goal luh danah pawh hian si nghak Onana dem theih a ni a, an defender te fimkhur tawk loh vang a tih theih bawk. United tlarhnung chet fuh loh vanga goal hnih an chhuah zawn hi United hian an tuar zui hle.
Si hnih an phurh hnuin United in an si phurh sut ngei tumin tan an khawh a, goal pawh an thun belh ve leh thuai. Minute 61-naah captain Bruno Fernandes chuan kawh tha takin a pet goal a, an si phurh a sut then. United hian tlawm pumpelh tum viau mah se goal an thun belh thei tawh lova, an mikhual Nottingham Forrest lakah uiawm takin an tlawm zui ta a ni.
Team lian Manchester United lakah an chak vangin Nottingham Forrest hian table-ah hma an sawn a, panganaah an inhlangkai. Nottingham Forrest in hma an sawn laiin United erawh an tlahniam leh duai tawh thung a, 13-naah an tlahniam. United hi pakuanaah inhlangkai hman bawk mah se table laihawl an chhuahsan rei thei tak tak lo.
City in tlawm an pumpelh
Inrinni zana inkhel dangah champion lai Manchester City chuan Crystal Palace lakah tlawm an pumpelh thei hram a, point khat an hmu.
Tunhnaia chak harsat City hi Crystal Palace hmachhawn turin Selhurst Park-ah an lenglut. An lenluhna mualah an khel tha lo viau, hnufual zawkah tum hnih an tan bakah an player Rico Lewis hnawhchhuah a ni tel bawk. Hnufual zawkah tum hnih tang mah se an khingpuite an chhang let thei zel a, tlawm an pumpelh thei hram.
Season thara khel tha lo, table hnuai lamah awm deuh ngar ngar Palace hian an mikhual City lakah bul an tan tha viau a, City tlarhnung an thiat nalh hle. Inkhel tan atanga minute lina lekah Daniel Muñoz chuan lei hrulah kawh zetin a pet goal a, hmahruaina goal a thun. Goal an chhuah hnu lawkah City in goal an thun nghal teuh hle a, goal post pet perin an hun tha neih hmasak an chhawr tangkai zo lo. Darkar chanve an khel tling chiah tihin Erling Haaland chuan fuh zetin a tauh goal a, an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Crystal Palace an khel tha chhunzawm a, goal pawh an thun leh thuai. Minute 56-naah Maxence Lacroix chuan fuh zetin a tauh goal a, hma an hruai nawn lehna goal a thun. Si phur nawn leh mah se City an buai phah lo. Minute 68-naah Rico Lewis chuan goal thunin an si phurh a sut nawn leh. City hian chak let ngei tumin tan an khawh a, an khingpuite an nawr na hle. Goal thun tuma tan an khawh vanglai takin an goal hnihna thuntu Rico Lewis chuan inhnaihchilh takah yellow card a hmu a, hnawhchhuah a ni. An mualah tam zawk ni bawk mah se Palace in goal an thun belh thei lo tluan a, 2-2 in an inhnehtawk zui ta a ni.
Champion lai City lakah tlawm an pumpelh vangin Crystal Palace hian table-ah hma an sawn hret. Hetih lai hian champion lai City erwh chuan palin an luah ve thung.