Inrinni zan khan English Premier League 2023-24 khelh chhunzawm a ni a. Team lian Manchester United chu Old Trafford-a an Brighton lakah an tlawm. An muala chetha zawn rei tak United hi thla 13 zet hnua a vawikhat nan Old Trafford-ah ngei an tlawm.
Manchester United hian Old Trafford-a an mikhual Brighton lakah bul an tan tha a, goal thun hmasa zawkah an tang teuh hle. Inkhel tan tirh lakah Marcus Rashford chuan goal thun theihna hun tha a nei a, uiawm takin a hlah hlauh thung. Beiseina sang tak nena an lak luh Rasmus Hojlund pawhin goal a thu zet a, goal a thun hmaa ball a lo out hman zeuh vangin Hojlund goal hi hnawl a ni tlat thung. Team lian laka goal thun thei Marcus Rashford pawh goal thun theihna hun tha nei zui leh a, a vanneih ni a ni lo a, goal bar a pet ber dawt a, a hun tha hloh zawn.
Mualneitu United lakah derthawng zawk ni mah se Brighton an insiamtha thuai a, an khingpui tlanghnur pal darhin, an timualpho zui viau a, goal thum ngawt an thun ta hial. Brighton hian fuh zetin an khingpuite an nawr tlang hnuin, chiang zetin United tlar hnung an thiat darh leh zet a, minute 20-naah Danny Welback chuan fuh zetin a pet goal a, hmahruaina goal a thun. An tlarhnung paldarh a nih hnuin United hian na takin an mikhualte an nawr zui nghal a, Hojlund chuan goal thun zui nghal mai mah se hnawl a ni a. Rashford-a’n hun tha a hlah ve leh bawk vangin si khat faia hnufual chungin chawlhlawk an hmang.
Chawlhlawk hnu lamah Brighton an khel tha chhunzawm a, goal an thun leh thuai. Minute 53-naah Lamptey siamsak atangin Pascal Groß chuan fuh zetin a pet goal a, an goal hnihna a thun. An mualah ngei goal hnih an chhuah vangin insiamthat mamawh viau mah se United an insiamtha thei mai lova, goal an chhuah belh leh hial zawk. Minute 71-naah João Pedro chuan Lamptey siamsak atangin an goal thumna a thun zui leh a. Team lian United lakah si thum fai ngawtin hma an hruai ta hial a ni.
Si thum fai ngawta an hnufual hnuin United in goal thun ngei tumin tan an khawh thar a, an hlawhtling ve ta nge nge. Minute 73-naah Hannibal Mejbri chuan mual laiah fuh taka a khalh rem hnuin kawh mar tha zetin a pet goal a, an si phurh a sut then ta nge nge. United tana Hannibal Mejbri goal thun hmasak ber hmangin Erik ten Hag-a team ten tlawm pumpelh beiseina an sei sang thar leh a, phur zawkin an mikhualte an nawr zui. Goal thun tum viau mah se hun tha an insiamchhuah tam thei lo va, Brighton nawr let tuar lovin goal an chhuah belh teuh viau zawk. Hun tawp dawn hnaihah Brighton hian United tlarhnung an thiat chiang leh viau a, goal thun theihna hun tha zet mai nei zui mah se uiawm takin an hlah ta tlat thung. Barcelona atanga an hawh Ansu Fati pet tha tak chu United si nghak Andre Onana chuan mak takin a lo dang. Goal thun belh thei bik lo mah se khelmualah ropui Old Trafford-ah ngei team lian Manchester United chu 3-1 in an hneh a, point thum hlu bik an hmu.
United timualphotu Brighton & Hove Albion hi EPL season tharah an chetha tluang viau a, vawi li an chak zawn ta chiah. Segulls hian khelh nga atanga point 12 hmuin, top four huangah an awm mek.
Brighton an chet that viau laiin Manchester United erawhin bul an tan chhe viau thung. Red Devils hian khelh nga atangin point ruk chiah an la hmu a. Kum 2014-15 hnu lamah EPL-a bul an tanchhiat ber tum a ni. An khelh hnuhnung vawi li-ah United hian goal 10 zet an chhuah a, hei hi kum 1979 hnu lamah khelh li atanga goal an chhuah tam ber tum a ni. Goal 10 zet an chhuah laiin goal ruk chauh an la thun a, insiamthat thuai an mamawh hle. Brighton lakah an tlawm leh tak vangin United hi 13-naah an tlahniam.
An mualah Manchester United an tlawm
