Thawhlehni zan khan UEFA Champions League quarter-final thawhkhatna khelh a ni a. He inelnaa champion ngun ber Real Madrid chu an mikhual Bayern Munich hneh lovin an tlawm. An mualah tlawm ngawt mah se Real Madrid hi tla tawh ang hiala ngaih chi erawh an ni lova, Allianz Arena-ah thlamuang takin Bayern Munich an siam dawn lo hulhual.
German champion Bayern Munich hi mikhual an nihna Santiago Bernabeu-ah an huangtau hle a, ngam takin mualneitu Real Madrid an nawr nghal miah miah. Inkhel tir lamah Michael Olise chuan free-kick atangin hlauhawm a siam nghal. Hemi hnu lawk hian goal thun theihnahun tha an nei zui leh nghal a. Dayot Upamecano chuan hnaite atangin a pet sual a, goal thun theihna remchang em em mai a neih chu uiawm takin a hlah a, Real Madrid an him nawn leh.
Goal an chhuah teuh viau teuh viau hnuin Real Madrid an insiamtha a, hlauhawm an siam zawn. Kylian Mbappe chuan goal thun theihna hun tha nei bawk mah se si nghak Manuel Nuer a paltlang thei lo. Vinicius Junior pawhin shot tha zet mai nei bawk mah se Nuer a paltlang thei bik lo bawk. Goal lut awm thei lawk lo mah se goal thun tumin an innawr tawn nasa hle a, inkhel hmuhnawm tak a ni. Inkhel hmuhnawm takah goal lut a awm theih loh reng hnuin chawlhlawk dawn hnaihah mikhual team Bayern Munich an chefuh ta nge nge. Bayern hian fuh zetin an khingpui tlarhnung an thiat a, Serge Gnabry ball pek fing leh fuh zet mai dawngtu Luis Diaz chuan minute 41-naah awlsam takin a pet goal a, hmahruaina goal thunin, 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal hnih a luh belh. Mikhual team Bayern Munich in fuh zetin an khingpuite an nawr tlang a. Mawi taka ball an inpek kual hnuin goal thun thei tak Harry Kane chuan striker tha tih tur dik tak a ti a, minute 46-na lekah box pawn atangin tawih zetin a pet goal a, an goal hnihna a thun.
An mualah ngei si hnih an phurh hnuin Real Madrid in an si phurh sut ngei tumin thapui tak meuh meuh an chhuah a, an khingpuite an nawr na hle. Goal thun theihna hun tha nei thin bawk mah se si nghak Manuel Nuer an paltlang hleithei tlat lo. An hun tha neih an hlah fo hnuin Kylian Mbappe chuan minute 76-naah goal thunin an si phurh a sut then ta nge nge.
An si phurh an sut then vangin Real Madrid phur viau mah se hun tawp dawn hnaih lamah goal an chhuah belh teuh thei hle. Bayern Munich in hun tawp dawn hnaihah goal thun theihna hun tha tak vawi hnih ngawt an nei zawn a, uiawm takin an hlah thung. Heng an hun tha neihte hi chhawr tangkai ta se semi-final lut chiang tluk an ni hial ang.
An mualah Real Madrid an tlawm
