Brenda Lee Krismas hla hlui, 1958-a a tlangzarh tawh “Rockin’ Around the Christmas Tree” chu kar khat chhunga US-a hla lar ber niin, Billboard Hot 100 (singles) chart-ah a No.1 a, he chart history-a Krismas hla No.1 kai thei pathumna a ni a, Brenda Lee tan he chart-a a hla No.1 kai thei pathumna niin, 1960 hnua he chart-a a No.1 lehna hmasa ber a ni bawk. Hetihrual hian tunkar Hot 100 chart top 10-ah Krismas hla dang pali an lang tel bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni. “Rockin’ Around the Christmas Tree” hian stream maktaduai 34.9 leh sales 3,000 a tling thei a, hei bakah hian radio airplay-ah ngaithlatu maktaduai 20.7 a nei thei bawk a, hei hi chart-ah a No.1 pui ta a ni.
He hla hi Johnny Marks phuah, Owen Bradley produce niin, 1958 khan an tlangzarh a, Hot 100 chart-ah hian December 1960-ah a lang ve tan chauh a, chutah chuan No.64 a ni a, a satu Brenda Lee hian chart top 10-a lang thei hla pali a neih hnuah he hla pawh hian No.14 a kai ve leh ta a ni.
December 2019 khan chart top 10-ah rawn langin, No.2 a ni a, heta tang hian 2022 tleng khan Krismas vuakvekah chart-ah a rawn lang thar ta ziah a, kar 9 a No.2 tawh a ni. Tichuan, an tlangzarh atanga kum 65-naah a official music video hmasa ber an tichhuak a, country star Tanya Tucker leh Trisha Yearwood te pawh an lang a, a video thar boruak nen chart No.1 a kai thei ta a ni.
Hot 100 chart-ah hian No.1 ni thei hi hla pathum chauh a la awm a, a hmasa ber chu The Chipmunk leh David Seville ‘The Chipmunk Song’ niin, 1958-ah kar lia No.1 a, a dawt leh chu Mariah Carey ‘What I Want for Christmas Is You’ niin, 1994-a tlangzarh a ni a, December 2019 khan a No.1 a, chuta tang chuan kumtin Krismas vuakvet-ah a No.1 zui ta ziah a, a pathumna chu “Rockin’ Around the Christmas Tree” hi a ni ta a ni.
Brenda Lee hla Hot 100 chart-a No.1 kai thei hmasa ber chu July 1960-a a hla “I’m Sorry” niin, kar thum a No.1 a, he kumah vek hian October thlaah a hla dang ‘I Want To Be Wanted’ a No.1 leh a, chuta tang chuan No.1 a nei ta lo reng a, kum 63 hnuah No.1 a kai leh ta chauh a ni.
Brenda Lee hian Hot 100 chart-a lang thei hla 46 nei tawhin, ’60s hmeichhe zaithiam zingah chuan a ngah ber a ni a, chart top 10-a lang thei pawh hla 12 neiin, ’60s hmeichhe solo artist-ah chuan Connie Francis nen a ngah ber an ni bawk. “Rockin’ About the Christmas Tree” an tlangzarh atanga Hot 100 chart No.1 tura nghak rei ber niin, kum 65 a nghak a, ahmaa hetiang record siamtu chu Mariah Carey ‘All I Want for Christmas Is You’ niin, 1994-a tlangzarh, 2019 a No.1 kai niin, kum 25 chhung a nghak ve thung. Hei bakah hian Brenda Lee hi chart No.1 nih inkar hlat ber a ni bawk a, a No.1 hnuhnun ber December 1960 niin, tunah December 2023-ah a No.1 leh chauh a, a inkarah kum 63 a tla hman a ni.
Brenda Lee hian December ni 11-ah kum 78 a tling tawh dawn a, “Rockin’ Around the Christmas Tree” hla a record hi chuan hmeichhe naupang kum 13 mi chauh a la ni a, mahse, tunah chuan hmeichhe zaithiam zinga Hot 100 chart-a No.1 ni thei upa ber record a siam ta. A hmaa he record siamtu chu Louis Armstrong niin, ani hi kum 62 mi niin, 1964 khan a hla “Hello, Dolly!” a lo No.1 pui tawh a ni.
Mariah Carey ‘What I Want for Christmas Is You’ chu stream maktaduai 32.4, sales 4,000 lehy radio airplay maktaduai 21.5 tling lehin, No.1 atangin No.2-ah a tawlh a, chart No.1 hlui bawk Jack Harlow “Lovin On Me’ chu stream maktaduai 25.1 leh airplay maktaduai 29.9 tlingin No.3-ah a tawlh ta bawk.
Krismas hla dang, 1957-a tlangzarh tawh Bobby Helms “Jungle Bell Rock” chuan stream maktaduai 27.6 leh airplay maktaduai 19.9 tlingin No.12 atangin No.4-ah a invawrh a, Wham! ‘Last Christmas’-in stream maktaduai 26.9 neiin No.13 atangin No.5 a kai a, Burl Ives “A Holly Jolly Christmas”-in stream maktaduai 26.2 neiin No.16 atangin No.6 a kai thar ve ta bawk. ‘Last Christmas’ leh ‘A Holly Jolly Christmas’ te hi 1984 leh 1964-a tlangzarh tawh kha niin, chart No.4 an lo kai ve ve tawh bawk a ni.
Chart-a kar li No.1 thei Taylor Swift ‘Cruel Summer’ chu No.2 atangin No.7-ah a tawlh a, chart No.1 hlui Doja Cat ‘Paint the Town Red’ chu No.3 atangin No.8-ah a tawlh a, SZA ‘Snooze’ chu No.5 atangin No.9-ah a tawlh ta bawk.
Chart top 10 khartu chu Krismas hla dang, 1963-a tlangzarh Andy Williams “It’s the Most Wonderful Time of the Year” niin, No.28 atangin No.10-ah a invawrh ve ta bawk.
An tlangzarh atanga kum 65-ah Brenda Lee ‘Rockin’ Around the Christmas Tree’ a No.1
![](https://theaizawlpost.org/wp-content/uploads/tap_logo-min-large.jpg)