Anaemia Camp-ah Buhtun

Thisen tlakchhamna ‘anaemia’ natna hi khawvel pumah buaipui mek a ni a. Mizoramah pawh natna tlanglawn tak a ni chho ve ta.
Hei hi taksa tana chaw tha pai chi ei tam loh vanga lo awm a ni a. A tlangpuiin thalai tleirawlah he natna hi a hluar a, a chhan pawh taksa chakna pai chi ni lo, hrawkin tui a tih zawng ei nasat luat vang a ni ber awm e.
Mizo tawng chuan thisen kan ti a, thisen chi hrang hrang a awm a, a var te pawh a awm a, chu chu thisen var kan ti leh mai a. Thisena a sen lai tak (red blood cell-haemoglobin) tlakchhamna phuhrukna tha tak chu Buhtun (Millet) hi a ni, tiin tun hnaia Serchhipa ‘Anaemia Camp’ ah khan zirtirna pek a ni a.
Buhtun thatzia kan inzirtir rual hian, taksa tana chakna pai tam chi ei uar tura inzirtirna leh, chung taksa tana chakna pai tam chi chaw tha inkawhhmuhna lamah hian tun aia nasa zawk hian thalaite hnenah zirtirna hi kalpui a pawimawh dawn hle tih a lang a. Taksa tana chakna pai tam si lo, hrawkin tui a tih zawng lei nana sum tam tak tak sen hnuah, taksa chak lo enkawl nana sum tam tak sen zui ngai leh bawk si dinhmuna kan din dante hi uar taka kan inhrilh mawlh mawlh a ngai tawh niin a lang.
Buhtun hi pi leh pute kha chuan an ei nasa a, tun hnuah hian eitur apui hi a tam ta a, Buhtun hria abar pawh kan awm tawh lo hial awm e. Hetih lai hian India sawrkar chuan Millet (Buhtun, Faisa, Puakzo leh chi hrang drang dang tam tak a la awm) thatzia hriain UNO-ah rawtna a thlen angin kumin 2023 hi International Year of Millet-ah puan a ni nghe nghe a, Mizoramah pawh kumtir khan agriculture minister hovin programme flag off te pawh kan lo neih tawh kha.
Millets hian mihring taksain a mamawh chaw tha a pai hnem a, kan buh ei thin anga cholestorel chhia leh calorie a pai tam ve loh avangin zunthlum leh thisen sang nei tan chaw tha tak a ni bawk. Millet hian lei chhia leh hmun ro pawh a ngam a, tui a mamawh tam lova, a thar hma bawk a, natna leh eichhetu lian tham a neih loh avangin enkawl a nuam a, sik leh sa thuah pawh Mizoram boruak hi Millet that theihna a ni bawk.
Tuna buhfai kan ei aia tha zawk, kan ramah pawh kum tin ramngaw thiat lova chin theih ni si hi Mizoram pawh hian kan bawhzui thiam a pawimawh dawn hle niin a lang.