Anant Ambani leh Radhika Merchant mo lawm lawkna senso a tam

Anant Ambani leh Radhika Merchant mo lawm lawkna senso a tam
Reliance Industries chairman leh managing director Mukesh Ambani fapa naupang ber Anant Ambani leh sumdawng lian Encore Healthcare Pvt. Ltd. leh entrepreneur Shaila Merchant te fanu Radhika Merchant te innei tur mo lawm lawkna March ni 1 atanga ni 3 thlenga Jamnagar, Gujarat-a an neihah khan India leh khawvel huapa milar an pungkhawm a, kha ni thum chhung mo lawm lawknaa an sum sen pawh a pui tham hem hem khawp mai, cheng vaibelchhe 1,259 vel niin an chhut!
Hetiang zat hi seng mah se Ambani chhungkaw tan buai phahna tham a ni chuang lo, Mukesh Ambani hausakna hi dollar tluklehdingawn 117.7 (cheng vaibelchhe 9,70,000 vel) a ni a, khawvela mihausa zual list-ah pakuana a ni pha a, India-a pahausa ber a nih bakah Asia-ah pahausa ber a ni bawk a, an tan vaibelchhe 1,000 tih velah buaina a awm tlat lo!
He mo lawm lawknaah hian khualtha mi 1,200 vel an sawm khawm a, chung zingah hian khawvel mihausa Bill Gates leh Mark Zuckerberg te pawh an tel a, Ivanka Trump leh Bollywood milar rual te pawh Jamnagar-ah hian an pungkhawm a, mo lawm lawknaa an khualtha te hi India-ah private jet-a phurh luh vek an ni a, airport atangin luxury car hmanga phurh kual leh vek an ni a, an thlenna leh ei leh in zawng zawng an tum sak vek bawk.
An sum senna lian zualah catering a tel a, catering-ah hian cheng vaibelchhe 210 vel seng angin an chhut. Hei bakah hian Rihanna concert turin an sawm lut thei a, Rihanna hi dollar maktaduai 8-9 (cheng vaibelchhe 66-74 vel) sengin an sawm!
He mo lawm lawkna hi a pui hep hep hle a, Akon pawhin ‘Chamak Chalo’ a zaipui zak zaka, stage-ah Shah Rukh Khan leh Salman Khan te pawh Ambani chhungkua hian an lam tir zak zak thei tlat mai a, chuvangin an sum sen hi tam awm reng pawh a ni e. Anant leh Radhika te hi July ni 12 a innei tur an ni a, an inneih tak taknaah pawh hian a vaibelchhe 1,000 tel chu an seng leh thoin a rinawm.
Ambani chhungkua hian mo lawmnaa insen hi an hreh vak lo ve reng reng bawk a, 2018-a an fanu Isha Ambani leh Anand Piramal te inneihnaah pawh khan Ambani chhungkaw sum sen hi cheng vaibelchhe 828 a kai vang tawh bawk. Hemi tum pawh hian mo lawmnaa zai turin Beyonce an lo sawm chhuak tawh bawk a ni.