Anant Ambani leh Radhika Merchant pre-wedding event-ah Rihanna a concert
Khawvela mihausa zual list-ah pawh lang pha, India-a pa hausa ber, Reliance Industries-a chairman leh managing director Mukesh Ambani fapa naupang ber Anant Ambani leh sumdawng lian Encore Healthcare Pvt. Ltd. leh entrepreneur Shaila Merchant te fanu Radhika Merchant te innei tur an ni bawk a, mo lawm lawkna event pawh a pui mep mep teh e. Khawvel huapa zaithiam lar, billionaire te pawh lo ni ve zak zak tawh Rihanna pawh mo lawm lâwkna concert sak turin an sawm chhuak thei tlat. Rihanna hian tun kum riat chhunga full concert a neih vawi khatna a ni nghe nghe. Anant leh Radhika te hi July ni 12-ah an innei dawn a ni.
He mo lawm lâwknaah hian khawvel milar tak tak pawh an pungkhawm a, chung zingah chuan Bill Gates, Mark Zucketberg, Sunder Pichai, Ivanka Trump bakah Bollywood milar rual Shah Rukh Khan, Aamir Khan, Salman Khan, Ranveer Sing leh Deepika Padukone bakah Bollywood star rual an pungkhawm a, Bollywood superstar SRK meuh pawh an event host atan an hmang thei tlat a ni.
Rihanna hi nikum khan Super Bowl halftime show leh Oscar-ah te pawh a perform nain, 2016-A Anti World Tour a neih hnuah tun hi full concert a neih lehna hmasa ber a ni a, he pre-wedding event-ah hian hla 19 zet a perform a. Rihanna hian cheng engzat nge a hlawh tih chu official-a puan a awm lo nain, cheng vaibelchhe 70 vel bawr he private concert atan hian a inchhiar niin report a awm.
Ambani chhungkua hi an hausa bawk a, inneihna vela an sum sen pawh hi a pui tham thin khawp mai. Mukesh-a fanu Isha-i’n 2018-a pasal a neih pawh khan mo lawmnaah Beyonce perform turin an sawm chhuak thei a, Mukesh-a fapa upa ber Akash-a’n 2019-a nupui a neih pawhin Coldplay frontman Chris Martin leh Chainsmokers te an perform tir tawh bawk a ni.
Tun tumah mo lawm lâwkna concert-ah hian Rihanna hian a hla lar hrang hrang a sa a, chung zingah chuan ‘Bitch Better Have My Money,’ ‘Work,’ ‘Umbrella,’ ‘Stay,’ ‘All of the Lights,’ ‘We Found Love,’ leh ‘Diamond’ te pawh a tel a, Ambani chhungkua he event-ah hian khawvel mihausa leh milar rual 1200 vel an sawm khawm a ni.
Anant Ambani leh Radhika Merchant pre-wedding event-ah Rihanna a concert
